روسی صدر نے ڈیجیٹل کرنسیوں کو باضابطہ بنانے کے پہلے قانون کی منظوری دے دی

ماسکو (شِنہوا) روسی صدر ولادیمیر پوتن نے روس میں ڈیجیٹل کرنسیوں اور ڈیجیٹل حقوق کی گردش کو جامع انداز میں باضابطہ بنانے کے لئے ملک کے پہلے قانون پر دستخط کر دیئے ہیں۔

اس قانون میں کرپٹو ایکسچینجز، ڈیجیٹل ڈیپازٹریز اور منڈی میں کام کرنے والے اداروں کے لئے قواعد و ضوابط طے کئے گئے ہیں جبکہ سرمایہ کاروں کے لئے کرپٹو کرنسی خریدنے کی شرائط بھی متعین کی گئی ہیں۔

قانون کے تحت ڈیجیٹل کرنسیوں اور غیر ملکی ڈیجیٹل انسٹرومنٹ کی تنظیم، ریکارڈ رکھنے اور تحویل سے متعلق امور کو منظم کیا گیا ہے۔ اس کے علاوہ کرپٹو کرنسی مائننگ، ڈیجیٹل حقوق کے اجرا اور لین دین اور ڈیجیٹل مالیاتی اثاثے جاری کرنے والے اطلاعاتی نظام کو چلانے والوں کی سرگرمیوں کو بھی قانون کے دائرے میں لایا گیا ہے۔ اس کے علاوہ ڈیجیٹل کرنسی ایکسچینج فراہم کرنے والے اداروں، ڈیجیٹل ڈیپازٹریز، بروکرز، اثاثہ جاتی انتظامی کمپنیوں، تجارتی منتظمین اور کلیئرنگ ہاؤسز کے لئے بھی معیارات مقرر کئے گئے ہیں۔

قانون کے مطابق یکم جولائی 2027 کے بعد صرف وہی ادارے ڈیجیٹل کرنسی کے تبادلے کی خدمات فراہم کر سکیں گے جن کا حکومت کے پاس اندراج ہوگا۔ ایسے اداروں کے لئے کم از کم ایک کروڑ 50 لاکھ روبل (تقریباً ایک لاکھ 86 ہزار امریکی ڈالر) سرمایہ کی شرط مقرر کی گئی ہے۔ انہیں مالیاتی منڈی کی کسی سیلف ریگولیٹری ادارے کی رکنیت بھی حاصل کرنا ہوگی۔

غیر منظور شدہ سرمایہ کار ثالث اداروں کے ذریعے صرف زیادہ لین دین والی کرپٹو کرنسیاں خرید سکیں گے تاہم ہر ثالث کے ذریعے ان کی سالانہ خریداری کی حد 3 لاکھ روبل ہوگی۔ اس کے برعکس منظور شدہ سرمایہ کار کسی بھی قسم کی کرپٹو کرنسی بغیر کسی حد کے خرید سکیں گے۔ نئے قانون کے تحت بینکوں کو مشکوک کرپٹو لین دین روکنے کے اختیارات بھی دیئے گئے ہیں۔

قانون میں ڈیجیٹل کرنسی کے تبادلے کی سرگرمی کو اس عمل سے تعبیر کیا گیا ہے جس میں کوئی ادارہ منظم تجارتی نظام سے باہر اپنے نام اور اپنے اکاؤنٹ پر باقاعدگی سے کرپٹو کرنسی کی خرید و فروخت کرے۔ اگر ایک ماہ کے دوران 35 لاکھ روبل سے زائد مالیت کے کم از کم دو سودے کئے جائیں تو اسے باقاعدہ تجارتی سرگرمی تصور کیا جائے گا۔

نئے ضوابط کے تحت کرپٹو کرنسی میں سرمایہ کاری سے متعلق اشتہارات میں واضح طور پر اس کے زیادہ خطرات اور ممکنہ مالی نقصان سے آگاہ کرنا لازمی ہوگا۔ اشتہارات میں ممکنہ خطرات سے متعلق معلومات اور ان سرگرمیوں پرعائد قانونی پابندیوں کا ذکر بھی کرنا ہوگا۔

قانون کے مطابق روس میں ڈیجیٹل کرنسی کے ذریعے ادائیگی کی اجازت نہیں ہوگی اور اس کی تشہیر بھی نہیں کی جا سکے گی۔

قانون کی بیشتر شقیں یکم ستمبر سے نافذ العمل ہوں گی جبکہ بعض دفعات یکم جولائی 2027 سے لاگو ہوں گی۔