کیپرٹینو (لارڈ میڈیا): ٹیکنالوجی کمپنی ایپل نے خبردار کیا ہے کہ مصنوعی ذہانت کے لیے ضروری میموری چپس کی عالمی قلت کے باعث آئی فونز کی مانگ پوری کرنے میں دشواری ہو سکتی ہے۔ ایپل نے اپنی تاریخ کی بہترین سہ ماہی کارکردگی ریکارڈ کی ہے، جہاں آئی فون کی فروخت میں 22 فیصد اور میک کمپیوٹرز کی فروخت میں 29 فیصد اضافہ ہوا۔
عالمی سطح پر میموری چپس کی کمی، جسے بعض ماہرین ریماگیڈون بھی قرار دے رہے ہیں، الیکٹرانکس صنعت کے لیے بڑا چیلنج بن چکی ہے۔ اے آئی سسٹمز کی بڑھتی ہوئی طلب کے باعث دیگر کمپنیوں کو بھی چپس کی فراہمی میں مشکلات کا سامنا ہے، جس سے مصنوعات کی قیمتیں بڑھ رہی ہیں۔
ایپل نے گزشتہ ماہ اپنی کئی مصنوعات کی قیمتوں میں 20 فیصد یا اس سے زائد اضافہ کیا، لیکن آئی فونز کی قیمتیں فی الحال تبدیل نہیں کی گئیں۔ تجزیہ کاروں کا کہنا ہے کہ نئے آئی فون ماڈلز کی لانچ کے ساتھ قیمتوں میں اضافہ متوقع ہے۔
ایپل کے چیف ایگزیکٹو ٹِم کک نے بھی کہا ہے کہ اگر میموری چپس کی قلت جاری رہی تو کمپنی کے لیے بڑھتی ہوئی طلب کے مطابق آئی فونز تیار کرنا مشکل ہو سکتا ہے۔
