بغداد (لارڈ میڈیا): عراق کے بااثر شیعہ رہنما مقتدیٰ الصدر نے ایران کی پاسداران انقلاب اور اس سے وابستہ مسلح گروہوں کو خبردار کیا ہے کہ وہ عراق کی سرزمین کو فوجی کارروائی کے لیے استعمال نہ کریں۔ انہوں نے سوشل میڈیا پلیٹ فارم ایکس پر جاری اپنے بیان میں کہا کہ ایران کی پاسدارانِ انقلاب کو عراق سے دور رہنا چاہیے اور ایسی سرگرمیوں سے اجتناب کرنا چاہیے جو عراق کے لیے نئے خطرات پیدا کریں۔
مقتدیٰ الصدر نے کہا کہ بے قابو ملیشیاؤں کو خلیجی ممالک کو یہ جواز نہیں دینا چاہیے کہ وہ عراق کی سرزمین کو نشانہ بنائیں۔ انہوں نے تمام فریقوں سے اپیل کی کہ وہ ایسے اقدامات سے گریز کریں جو خطے میں کشیدگی بڑھا سکتے ہیں۔
انہوں نے عراق کی خودمختاری کی خلاف ورزیوں کی مذمت کرتے ہوئے کہا کہ بعض مسلح گروہ عراق کو ایسی جنگ میں دھکیلنے کی کوشش کر رہے ہیں جس کا ملک کو کوئی فائدہ نہیں ہوگا۔ انہوں نے حکومت پر زور دیا کہ وہ ریاستی رٹ کو مضبوط بنائے اور تمام مسلح سرگرمیوں کو قانون کے دائرے میں لائے۔
مقتدیٰ الصدر نے خبردار کیا کہ غیر فعال دہشت گرد عناصر عراق کو عدم استحکام سے دوچار کر سکتے ہیں۔ انہوں نے کہا کہ عراق اور اس کے عوام کو امن کی ضرورت ہے کیونکہ تنازعات نے ملک کے وسائل، معیشت اور قومی وقار کو نقصان پہنچایا ہے۔
بیان کے اختتام پر مقتدیٰ الصدر نے خطے کے ممالک سے امن، مفاہمت اور باہمی تعاون کی اپیل کی اور کہا کہ مشرق وسطیٰ کو غیر ملکی فوجی اڈوں اور بیرونی مداخلت سے پاک ہونا چاہیے۔
