راولپنڈی (لارڈ میڈیا) کیپٹن محمد سرور شہید کے 78ویں یوم شہادت پر پاکستان کی مسلح افواج کے سربراہان نے انہیں زبردست خراج عقیدت پیش کیا ہے۔ فیلڈ مارشل سید عاصم منیر، نیول چیف ایڈمرل نوید اشرف اور ایئر چیف مارشل ظہیر احمد بابر سدھو نے ان کی قربانیوں کو سراہا۔
پاک فوج کے شعبہ تعلقات عامہ (آئی ایس پی آر) کے مطابق 27 جولائی 1948 کو پہلی کشمیر جنگ میں کیپٹن سرور نے تل پترا میں جرات مندی سے لڑتے ہوئے جام شہادت نوش کیا۔ وہ پاکستان کے پہلے نشان حیدر کے حامل ہیں۔
آئی ایس پی آر نے کہا کہ کیپٹن سرور نے اپنے جوانوں کی قیادت کرتے ہوئے غیر معمولی بہادری اور عسکری حکمت عملی کا مظاہرہ کیا۔ ان کی قربانی جرات، استقامت اور وطن سے وابستگی کی علامت ہے۔
بیان میں مزید کہا گیا کہ کیپٹن سرور کی میراث کو پاکستان کے عوام اور مسلح افواج انتہائی احترام کے ساتھ سلام پیش کرتے ہیں۔
