کھوئی رٹہ (لارڈ میڈیا): پاکستان مسلم لیگ (ن) پنجاب کے صدر رانا ثنا اللہ نے آزاد جموں و کشمیر میں انتخابی جلسے سے خطاب کرتے ہوئے ترقیاتی کاموں کے وعدے کیے ہیں۔ انہوں نے کہا کہ آزاد کشمیر میں ترقیاتی کاموں کا جال بچھایا جائے گا اور عوام کی محرومیوں کا ازالہ ہوگا۔
رانا ثنا اللہ نے کہا کہ مسلم لیگ (ن) نے ہمیشہ عملی کارکردگی کے ذریعے عوامی خدمت کی ہے اور آئندہ بھی یہ سلسلہ جاری رہے گا۔ انہوں نے آزاد کشمیر کے عوام کو باشعور قرار دیتے ہوئے کہا کہ وہ اپنے مستقبل کے لیے درست فیصلے کریں گے۔
انہوں نے آزاد کشمیر کے عوام سے مسلم لیگ (ن) کو ووٹ دینے کی اپیل کی تاکہ ترقی اور خوشحالی کا نیا دور شروع ہو سکے۔ رانا ثنا اللہ نے میرپور ڈویژن کے انتخابات کے پہلے مرحلے کا ذکر کرتے ہوئے کہا کہ پولنگ 27 جولائی کو ہوگی۔
ن لیگ کی انتخابی مہم کا آغاز مظفرآباد سے ہوا تھا، جہاں نواز شریف اور مریم نواز نے بڑے انتخابی وعدے کیے تھے۔ میرپور ڈویژن میں 13 انتخابی حلقے ہیں جہاں 14 لاکھ ووٹرز اپنا حق رائے دہی استعمال کریں گے۔
حلقہ ایل اے-1 ڈڈیال میں مسلم لیگ (ن) کے اظہر صادق اور پیپلز پارٹی کے افسر شاہد کے درمیان کانٹے دار مقابلہ متوقع ہے۔ اسی طرح حلقہ ایل اے-2 میرپور میں پیپلز پارٹی کے چوہدری قاسم مجید، آزاد امیدوار ظفر انور اور مسلم لیگ (ن) کے عظیم بخش کے درمیان مقابلہ ہوگا۔
میرپور میں قائد مسلم لیگ (ن) میاں محمد نواز شریف، مریم نواز اور وفاقی وزراء بھی انتخابی جلسے سے خطاب کریں گے۔ جلسہ گاہ کو پارٹی پرچموں اور بینرز سے سجایا گیا ہے جبکہ موسم بھی خوشگوار ہے۔
