لاہور (لارڈ میڈیا): پاکستان کرکٹ بورڈ (پی سی بی) نے 2026-27 کے ڈومیسٹک سیزن کے شیڈول اور ڈھانچے میں اہم تبدیلیوں کا اعلان کیا ہے۔ اس تبدیلی کے تحت آئی سی سی ون ڈے ورلڈکپ کی تیاریوں کو ترجیح دی گئی ہے۔
سیزن کا آغاز 11 اگست سے ملتان میں چار ٹیموں پر مشتمل ایک روزہ ‘نیشنل چیمپئنز کپ’ سے ہوگا، جہاں ٹیموں کا انتخاب قومی سلیکشن کمیٹی کرے گی تاکہ ون ڈے فارمیٹ میں نئے ٹیلنٹ کی تلاش کی جا سکے۔
اس سیزن میں دو لسٹ اے ٹورنامنٹس منعقد کیے جائیں گے، جن میں نیشنل چیمپئنز کپ کے بعد پریزیڈینٹ کپ شامل ہوگا۔ مزید برآں، ریجنل ٹیموں کی تعداد 18 سے بڑھا کر 20 کر دی گئی ہے، جس میں سیالکوٹ اور پشاور کو اضافی ٹیمیں دینے کی اجازت دی گئی ہے۔
قائداعظم ٹرافی کو پہلی بار گولڈ اور سلور ڈویژن میں تقسیم کیا گیا ہے، جس میں گولڈ ڈویژن میں آٹھ مضبوط ترین ٹیمیں اور سلور ڈویژن میں 12 ٹیمیں حصہ لیں گی۔ دونوں ڈویژنز کا آغاز یکم نومبر سے ہوگا۔
ڈومیسٹک سیزن کا اختتام فروری اور مارچ میں ہونے والے نیشنل ٹی ٹوئنٹی کپ پر ہوگا۔ پی سی بی نے بتایا کہ اس نئے شیڈول کا مقصد قومی کھلاڑیوں کو زیادہ معیاری مقابلے فراہم کرنا اور ورلڈ کپ سے قبل بہترین استعداد تیار کرنا ہے۔
