نیو یارک (لارڈ میڈیا) : فیفا ورلڈ کپ 2026 کے سیمی فائنل میں ارجنٹائن نے انگلینڈ کے خلاف میچ میں اپنی گہرے نیلے رنگ کی متبادل جرسی پہننے کی اجازت حاصل کر لی ہے۔ ارجنٹائن نے فیفا سے درخواست کی تھی کہ اس جرسی کو انگلینڈ کے خلاف ماضی کی کامیابیوں کی یاد دہانی کے لیے استعمال کیا جائے، جسے فیفا نے منظور کر لیا ہے۔
ارجنٹائن کی ٹیم کا ماننا ہے کہ یہ جرسی ان کے اعتماد کو مزید مضبوط بنا سکتی ہے کیونکہ انگلینڈ کے خلاف ورلڈ کپ کی تین فتوحات میں سے دو اسی جرسی میں تھیں۔ فیفا نے تصدیق کی ہے کہ سیمی فائنل میں ارجنٹائن گہرے نیلے اور سیاہ رنگ کی جرسی جبکہ انگلینڈ اپنی روایتی سفید جرسی میں میدان میں اترے گا۔
اس فیصلے نے فٹبال شائقین کو 1986 اور 1998 کے تاریخی مقابلے یاد دلائے ہیں، جب یہی جرسی ارجنٹائن کے لیے کامیابی کی علامت بنی تھی۔ 1986 کے ورلڈ کپ میں ڈیاگو میراڈونا کے ’ہینڈ آف گاڈ‘ گول اور 1998 میں پنالٹی شوٹ آؤٹ میں فتح نے ان لمحات کو یادگار بنا دیا۔
ارجنٹائن کی رواں ورلڈ کپ میں کارکردگی متاثر کن رہی ہے، ٹیم نے اپنی روایتی جرسی میں 6 میں سے 5 میچ جیتے ہیں جبکہ متبادل جرسی میں اردن کے خلاف کامیابی حاصل کی تھی۔ انگلینڈ نے بھی اپنی سفید جرسی میں 5 میچوں میں 4 فتوحات حاصل کی ہیں۔
اب دیکھنا یہ ہے کہ کیا نیلی جرسی ارجنٹائن کے لیے خوش قسمتی ثابت ہوتی ہے یا انگلینڈ تاریخ کا رخ بدلنے میں کامیاب رہتا ہے۔
