تہران (لارڈ میڈیا): ایران کے وزیرِ تیل محسن پاک نژاد نے کہا ہے کہ امریکی پابندیوں کے باوجود ایران کی تیل برآمدات جاری رہیں گی۔ انہوں نے کہا کہ ایران نے پابندیوں کے اثرات سے نمٹنے کے لیے مؤثر نظام اور متبادل ڈھانچے قائم کر رکھے ہیں، جس کی وجہ سے تیل کی برآمدات میں کوئی رکاوٹ نہیں آئے گی۔
انہوں نے مزید کہا کہ امریکا کی جانب سے دی گئی 60 روزہ رعایتی مدت کے دوران بھی متبادل انتظامات کو برقرار رکھا گیا، تاکہ پابندیوں کی دوبارہ بحالی کی صورت میں برآمدات متاثر نہ ہوں۔
محسن پاک نژاد کے مطابق ایران توانائی کے شعبے میں اپنی سرگرمیاں جاری رکھے گا اور عالمی منڈی میں خام تیل کی فراہمی معمول کے مطابق برقرار رکھنے کی کوشش کرے گا۔
یہ بیان ایسے وقت میں سامنے آیا ہے جب امریکا نے ایرانی تیل کی فروخت پر دوبارہ سخت پابندیاں نافذ کرنے کا اعلان کیا ہے، جبکہ خطے میں کشیدگی اور عالمی توانائی کی منڈیوں پر بھی گہری نظر رکھی جا رہی ہے۔
معاشی ماہرین کے مطابق ایران کی جانب سے تیل برآمدات جاری رکھنے کا اعلان عالمی توانائی مارکیٹ کے لیے اہم پیش رفت ہے، تاہم امریکی پابندیوں اور علاقائی کشیدگی کے باعث مستقبل کی صورتحال کا انحصار سفارتی اور جغرافیائی سیاسی حالات پر ہوگا۔
