اقوام متحدہ (شِنہوا) چین نے تمام فریقین بالخصوص اسرائیل پر زور دیا ہے کہ وہ جنگ بندی معاہدے پر مکمل عملدرآمد کریں اور غزہ میں حقیقی اور پائیدار جنگ بندی کو یقینی بنائیں۔
اقوام متحدہ میں چین کے مستقل مندوب فو کانگ نے مغربی کنارے میں اسرائیلی بستیوں کی سرگرمیوں اور غزہ کی پٹی کی صورتحال کا جائزہ لینے کے لئے منعقد ہونے والے اقوام متحدہ کی سلامتی کونسل کے ایک اجلاس سے خطاب کیا۔ انہوں نے کہا کہ تاریخ نے بارہا ثابت کیا ہے کہ سلامتی ایک دوسرے سے جڑی ہوئی ہے اور کوئی بھی ملک اپنی سلامتی دوسروں کی عدم سلامتی کی قیمت پر قائم نہیں رکھ سکتا۔ انہوں نے کہا کہ فوجی قبضہ اور دباؤ کبھی بھی دیرپا امن نہیں لا سکتے۔
فو کانگ نے کہا کہ اسرائیل کو قابض طاقت کے طور پر بین الاقوامی انسانی قانون کے تحت اپنی ذمہ داریاں پوری کرنی چاہئیں، انسانی امداد تک رسائی پر پابندیاں ختم کرنی چاہئیں اور اقوام متحدہ کی ریلیف اینڈ ورکس ایجنسی برائے فلسطینی مہاجرین (یو این آر ڈبلیو اے) سمیت انسانی اداروں کے ذریعے امداد کی فراہمی کو آسان بنانا چاہیے۔
فو کانگ نے مزید کہا کہ مغربی کنارے میں کشیدگی کو کم کرنا ضروری ہے اور دو ریاستی حل ہی فلسطین کے مسئلے کا واحد قابل عمل راستہ ہے۔
فو کانگ نے عالمی برادری پر زور دیا کہ وہ دو ریاستی حل کے لئے اتفاق رائے کو مضبوط کرے، فلسطین کی آبادی یا جغرافیائی حیثیت میں تبدیلی کی کسی بھی کوشش کو مسترد کرے اور ان یکطرفہ اقدامات کی مخالفت کرے جو اس حل کی بنیادوں کو کمزور کرتے ہیں۔ انہوں نے 1967 کی سرحدوں پر مبنی ایک آزاد فلسطینی ریاست کے قیام کی حمایت کی جس کا دارالحکومت مشرقی بیت المقدس ہو اور جو مکمل خودمختاری رکھتی ہو۔
