بیجنگ (شِنہوا) چین کی وزارت عوامی تحفظ کے ایک عہدیدار ژو لی نے بتایا کہ چین میں رپورٹ ہونے والے ٹیلی کام فراڈ کے کیسز کی تعداد میں اکتوبر 2025 سے مسلسل آٹھ ماہ کے دوران گزشتہ سال کی نسبت کمی ہوئی ہے۔
جمعہ کو ایک پریس کانفرنس میں ژو نے واضح کیا کہ ٹیلی کام اور آن لائن فراڈ، جو کہ سرحد پار منظم جرائم کی ایک عام شکل ہے، دنیا بھر میں ایک عالمی خطرہ اور گورننس کے لئے ایک بڑا چیلنج بن کر ابھرا ہے۔
انہوں نے کہا کہ 2025 سے چینی حکام نے قانون نافذ کرنے والے اداروں کی کارروائیوں، مخصوص شعبوں کے ضوابط، تکنیکی جوابی اقدامات، عوامی آگاہی اور روک تھام کی مہمات اور بین الاقوامی تعاون کے ذریعے اس جرم سے نمٹنے کے لئے مربوط کوششوں کو تیز کیا ہے، جس کے نمایاں نتائج حاصل ہوئے ہیں۔
چین نے متعلقہ ممالک کے ساتھ قانون نافذ کرنے والے اداروں کے بین الاقوامی تعاون کو بھی مضبوط کیا ہے، جس کے نتیجے میں میانمار کے شمالی خطے اور میاوادی کے ساتھ ساتھ کمبوڈیا میں بڑے پیمانے پر جوئے اور فراڈ کے ٹھکانوں کو ختم کیا گیا ہے۔
ژو نے بتایا کہ ان مشترکہ کارروائیوں کے ذریعے حکام نے سرحد پار جوئے اور فراڈ کے بڑے گروہوں کے اہم سرغنہ افراد کو گرفتار کیا ہے جن میں چھن ژی اور شی ژی جیانگ شامل ہیں جنہیں شی کریانگ کائی کے نام سے بھی جانا جاتا ہے۔
وزارت عوامی تحفظ کے مطابق چین نے 2025 سے اینٹی ٹیلی کام اینڈ آن لائن فراڈ قانون کے تحت ٹیلی کام اور آن لائن دھوکہ دہی کے خلاف کوششیں تیز کر دی ہیں اور ملکی و بین الاقوامی سطح پر اور آن لائن و آف لائن دونوں طرح سے اقدامات کو مربوط کیا ہے۔
