لندن (شِنہوا) امریکی صدر ڈونلڈ ٹرمپ نے خبردار کیا ہے کہ اگر برطانوی حکومت اپنی ڈیجیٹل سروسز ٹیکس (ڈی ایس ٹی) ختم نہیں کرتی تو وہ برطانیہ پر بھاری محصولات عائد کر سکتے ہیں۔
ٹیلی گراف کو دیئے گئے ایک انٹرویو میں ٹرمپ نے اس ٹیکس کو امریکہ کی بڑی ٹیکنالوجی کمپنیوں جیسے ایپل، گوگل اور میٹا کو غیر منصفانہ طور پر نشانہ بنانے کے مترادف قرار دیا۔
رپورٹ کے مطابق برطانیہ میں بڑے سرچ انجنز، سوشل میڈیا پلیٹ فارمز اور آن لائن مارکیٹ کی آمدنی پر 2 فیصد ٹیکس عائد کیا جاتا ہے۔
رپورٹ کے مطابق ٹرمپ نے کہا کہ مجھے یہ پسند نہیں کہ وہ امریکی کمپنیوں کو نشانہ بنائیں، کیونکہ دراصل آپ ہماری عظیم امریکی کمپنیوں کی بات کر رہے ہیں۔ چاہے ہمیں وہ کمپنیاں پسند ہوں یا نہ ہوں، وہ امریکی کمپنیاں ہیں اور دنیا کی سرفہرست کمپنیاں ہیں۔
انہوں نے مزید کہا کہ ہم اس کا جائزہ لے رہے ہیں اور ہم برطانیہ پر بڑے محصولات لگا کر اس کا جواب بہت آسانی سے دے سکتے ہیں۔ اس لئے انہیں محتاط رہنا چاہیے۔ اگر انہوں نے یہ ٹیکس ختم نہ کیا تو ہم ممکنہ طور پر برطانیہ پر بڑے محصولات عائد کریں گے۔
رپورٹ میں کہا گیا ہے کہ جمعرات کو محکمہ ریونیو اینڈ کسٹمز کی جانب سے جاری اعداد و شمار کے مطابق 2025-2026 کے مالی سال میں برطانیہ کے ڈیجیٹل سروسز ٹیکس سے 94 کروڑ 40 لاکھ پاؤنڈ (تقریباً 1.3 ارب امریکی ڈالر) کی آمدنی حاصل ہوئی جو گزشتہ مالی سال کے مقابلے میں 17 فیصد زیادہ ہے۔ اخبار کے مطابق سرکاری اندازوں کے تحت یہ ٹیکس 2030 تک سالانہ 1.4 ارب پاؤنڈ (تقریباً 1.88 ارب ڈالر) تک پہنچ سکتا ہے۔
رپورٹ کے مطابق برطانیہ نے موقف اختیار کیا ہے کہ جب تک عالمی سطح پر ٹیکس سے متعلق کوئی معاہدہ نہیں ہو جاتا یہ ٹیکس برقرار رہے گا۔ برطانوی حکومت کا کہنا ہے کہ اس سے یہ یقینی بنایا جاتا ہے کہ ڈیجیٹل کمپنیاں ملک میں اپنی معاشی سرگرمیوں کے مطابق ٹیکس ادا کریں۔
