بیجنگ (شِنہوا) چین نے فضائی حدود کی کارکردگی بہتر بنانے اور ہوا بازی کی صنعت کی ترقی کو آگے بڑھانے کے لئے عارضی فضائی روٹس کے انتظام سے متعلق اقدامات میں ترمیم کی ہے۔
فضائی آمدورفت کے انتظام کی مرکزی کمیٹی کے دفتر کے مطابق ان اقدامات کے تحت عارضی فضائی راستوں کے دائرہ کار کو بڑھاتے ہوئے انہیں مستقل روٹس کے برابر قرار دیا گیا ہے۔ اس تبدیلی سے پروازوں کے منصوبے جمع کرانے اور یکساں انتظام ممکن ہوگا جس کے نتیجے میں پروازوں کا فاصلہ کم ہوگا اور کاربن کے اخراج میں کمی آئے گی۔
مزید برآں نظام کو درخواست پر مبنی طریقہ کار سے نوٹیفکیشن سسٹم میں تبدیل کیا جا رہا ہے جس کے تحت فضائی روٹس باقاعدگی سے کھلے رہیں گے اور کسی بھی تبدیلی سے قبل پیشگی اطلاع دی جائے گی جس سے منصوبہ بندی بہتر ہوگی۔
ترمیم شدہ اقدامات یکم ستمبر 2026 سے نافذ العمل ہوں گے۔ دفتر کے مطابق روٹس کی افادیت کا جائزہ لیا جائے گا، ضروری ترامیم کی جائیں گی اور نوٹیفکیشن کے نظام کو مزید بہتر بنایا جائے گا تاکہ پروازوں کی حفاظت کو یقینی بنایا جا سکے۔
