موسمِ بہار کے آغاز کے ایک خوشگوار اختتامِ ہفتہ پر ہنگ ایکسپو میں خاصی رونق رہی۔ یہ نمائش خطے کی سب سے بڑی آٹو نمائشوں میں سے ایک ہے۔ شائقین کی بڑی تعداد نے نمائش میں پہنچ کر اسپورٹس کاروں، قدیم گاڑیوں، سیڈان اور ایس یو ویز کے مختلف ماڈلز کا جائزہ لیا۔
تین روزہ انٹرنیشنل آٹوموبائل اینڈ ٹیوننگ شو 2026 چینی کار ساز کمپنیوں کے لئے وسطی اور مشرقی یورپ میں اپنی موجودگی بڑھانے کا ایک اہم پلیٹ فارم بھی بن گیا ہے۔ جیلی، بی اے آئی سی، ایم جی اور اوموڈا سمیت بڑے برانڈز یہاں اپنے جدید ماڈلز پیش کر رہے ہیں اور علاقائی منڈی میں اپنے اسٹریٹجک عزائم کا اظہار کر رہے ہیں۔
نمائش کے افتتاحی دن جمعہ کو منعقدہ ایک پریس کانفرنس میں جیلی نے باضابطہ طور پر ہنگری کی منڈی میں داخلے کا اعلان کیا۔ کمپنی نے اس موقع پر ایک پلگ اِن ہائبرڈ ایس یو وی اور ایک بیٹری سے چلنے والی الیکٹرک ایس یو وی متعارف کرائی۔ نمائش کے دوران صرف تین گھنٹوں کے اندر 200 سے زائد صارفین نے ٹیسٹ ڈرائیو کےلئے اندراج کروا لیا۔
ہنگری میں جیلی کے جنرل منیجر یانگ چینگ نے تقریبِ رونمائی کے موقع پر کہا کہ ہنگری کی منڈی میں داخلہ ہماری یورپی حکمت عملی کا ایک اہم حصہ ہے۔ انہوں نے بتایا کہ کمپنی ہنگری کو مشرقی یورپ میں برانڈنگ، سروسز، اسپیئر پارٹس کے گودام اور گاڑیوں کی لاجسٹکس کے لئے ایک مرکز کے طور پر استعمال کرنے کا منصوبہ رکھتی ہے۔
یانگ نے مزید کہا کہ نئے متعارف کرائے گئے ماڈلز کو یورپی یونین کے ضوابط اور مقامی منڈی کی ضروریات کے مطابق تیار کیا گیا ہے۔ انہوں نے بتایا کہ ان گاڑیوں کو جرمنی میں واقع جیلی کے تحقیق و ترقی کے مرکز میں سخت موسمِ سرما کی آزمائشوں، حقیقی حالات میں جانچ، چارجنگ ٹیسٹ اور اسمارٹ کنیکٹیویٹی کے تجربات سے گزارا گیا ہے۔
پہلی بار شرکت کرنے والی کمپنی بی اے آئی سی نے بھی نمائش میں خاصی توجہ حاصل کی۔ بی اے آئی سی ہنگری کے ٹیکنیکل منیجر ڈینیئل پاتاکی نے کہا کہ انہیں حیرت ہے کہ اتنی بڑی تعداد میں لوگ اس برانڈ میں دلچسپی لے رہے ہیں۔ کمپنی ہنگری میں اپنی سرگرمیوں کا آغاز کرتے ہوئے نمائش میں ایک ہائبرڈ ماڈل اور تین پیٹرول سے چلنے والی گاڑیاں پیش کر رہی ہے۔
پاتاکی نے کہا کہ بی اے آئی سی کا ہنگری میں گاڑیوں کی فروخت اور سروس کے تقریباً 15 مراکز قائم کرنے کا منصوبہ ہے تاکہ ملک بھر میں اپنی موجودگی یقینی بنائی جا سکے اور بعد ازاں کاروبار کو ممکنہ طور پر پڑوسی ممالک میں توسیع کی جائے۔
چین کی ایس اے آئی سی کمپنی کا ایم جی برانڈ بوداپست آٹو شو میں چوتھی بار شرکت کر رہا ہے اور نمائش میں ایک مکمل الیکٹرک اسپورٹس کار، ایک مکمل الیکٹرک ایس یو وی اور تین ہائبرڈ ماڈلز پیش کئے جا رہے ہیں۔ ایم جی نے یورپی صارفین کی ڈرائیونگ ترجیحات کے مطابق اپنی گاڑیوں کو ڈیزائن کرنے کے لئے یورپ میں ایک ڈیزائن سینٹر بھی قائم کیا ہے۔
حالیہ برسوں میں چینی کار ساز کمپنیاں خاص طور پر الیکٹرک گاڑیوں کے شعبے میں یورپ میں تیزی سے اپنی موجودگی بڑھا رہی ہیں۔
بوداپست سے شِنہوا نیوز ایجنسی کے نمائندوں کی رپورٹ
