شی آن (شِنہوا) چین کے شمال مغربی صوبے شانشی کے شہر وے نان میں ماہرین آثار قدیمہ نے 100 سے زائد پیلیولتھک مقامات دریافت کیے ہیں۔ان سے اس بات کی تصدیق ہوتی ہے کہ اس علاقے میں انسانی سرگرمیوں کا آغاز کم از کم 6 لاکھ سال قبل ہوا تھا۔
یہ مقامات چوتھی قومی ثقافتی ورثہ شماری کے تحت ایک سالہ خصوصی سروے کے دوران دریافت کیے گئے۔
یہ دریافتیں اس علاقے میں قدیم انسانی ارتقا کے حوالے سے نہایت اہم شواہد فراہم کرتی ہیں اورکبھی قدیم چین کا مرکزی خطہ رہنے والے مشرقی گوانژونگ میں ابتدائی انسانی تاریخ اور ثقافتی خصوصیات کے بارے میں سمجھنے کو مزید بہتر بناتی ہیں۔
شہر وے نان کو پیلیولتھک آثار قدیمہ کے حوالے سے ایک تاریخی حیثیت حاصل ہے جہاں 1960 اور 1970 کی دہائیوں میں مشہور لانتیان انسان اور دالی انسان کی باقیات دریافت ہوئی تھیں۔
شانشی اکیڈمی آف آرکیالوجی کی قیادت میں 2020 سے کیے گئے سروے نے شہر بھر میں پیلیولتھک ثقافت سے متعلق وسیع شواہد فراہم کیے ہیں۔
وے نان میوزیم کےمنتظم زو لیانگ کے مطابق یہ دریافتیں اس علاقے میں انسانی رہائش کی تسلسل سے جاری تاریخ کو مزید پیچھے لے جاتی ہیں اور دریائے زرد کی تہذیبی وراثت کو سمجھنے کے لیے قیمتی ثبوت فراہم کرتی ہیں۔
