وزیراعظم محمد شہباز شریف سے بل گیٹس فاؤنڈیشن کے صدر برائے عالمی ترقی کرس ایلیاس نے وفد کے ہمراہ ملاقات کی جس میں پاکستان میں انسداد پولیو کی کوششوں اور باہمی تعاون پر تفصیلی تبادلہ خیال کیا گیا۔
وزیراعظم نے اس موقع پر کہا کہ پاکستان میں پولیو کے مکمل سدباب تک بل گیٹس فاؤنڈیشن جیسے قابل اعتماد شراکت داروں کے تعاون سے اقدامات جاری رکھے جائینگے، پاکستان سے پولیو کے خاتمے کیلئے بل گیٹس کی خدمات کو ہمیشہ یاد رکھا جائیگا اور اس ضمن میں مسلم برادر ممالک خصوصاً سعودی عرب کے تعاون پر بھی پاکستان شکر گزار ہیں۔
انکا کہنا تھا کہ حکومت جامع حکمت عملی اور موثر ٹیم کیساتھ عملی اقدامات کر رہی ہے اور پولیو کے مکمل خاتمے کیلئے پرعزم ہے، خاطر خواہ کامیابیوں کے باوجود بیماری کیخلاف جنگ میں ہنگامی بنیادوں پر مزید اقدامات ناگزیر ہیں۔
وزیراعظم نے کہا کہ وفاقی حکومت پولیو ٹیموں کی ملک بھر میں رسائی یقینی بنانے کیلئے صوبوں کیساتھ مکمل ہم آہنگی کے تحت کام کر رہی ہے اور انسداد پولیو سے متعلق منصوبے پبلک سیکٹر ڈویلپمنٹ پروگرام کے تحت جاری رکھے جائیں گے۔
انہوں نے وفاقی وزارتِ صحت کو ہدایت کی کہ انسدادِ پولیو، عوامی آگاہی اور ویکسین کی فراہمی کیلئے تمام متعلقہ اداروں کیساتھ ملکر سفارشات مرتب کی جائیں۔
ملاقات کے دوران کرس ایلیاس نے وزیراعظم کی انسدادِ پولیو پر ذاتی توجہ اور موثر عملی اقدامات کو سراہتے ہوئے کہا کہ پاکستان پولیو کے مکمل خاتمے کیلئے درست سمت میں گامزن ہے، وفاقی و صوبائی حکومتوں اور متعلقہ اداروں کیساتھ انسداد پولیو پر تعمیری مشاورت جاری رہے گی۔
انہوں نے پاکستان میں پولیو وائرس کی ماحولیاتی موجودگی کے خاتمے اور تمام علاقوں میں پولیو ٹیموں کی رسائی کیلئے کیے گئے اقدامات کو قابل تحسین قرار دیا۔
