لاہور ہائیکورٹ نے پی ایچ اے کو پارکوں میں کاروباری سرگرمیاں روکنے، داتا دربار کے سامنے درختوں کی کٹائی بارے انکوائری کا حکم جاری کردیا۔
جمعہ کو لاہور ہائیکورٹ میں جسٹس شاہد کریم نے سموگ و ماحولیاتی آلودگی تدارک بارے درخواستوں پر سماعت کی۔
عدالتی حکم پر پی ایچ اے، محکمہ ماحولیات اور کمیشن کے ممبر سید کمال حیدر سمیت درخواست گزار کے وکیل اظہر صدیق پیش ہوئے۔
ممبر جوڈیشل کمیشن سید کمال حیدر نے عدالت کو بتایا کہ پی ایچ اے نے مساجد کے ساتھ 38 واٹر ٹینکس کو فعال کر دیا ہے، واٹر ٹریٹمنٹ پلانٹ نہ ہونے کے باعث 2 پلانٹس کو سیل کر دیا گیا ہے، 8 انڈسٹریل یونٹس نے اپنا واٹر ٹریٹمنٹ پلانٹ فعال کر دیا ہے، یکم جنوری سے گزشتہ روز تک دھواں چھوڑنے والے 31 صنعتی یونٹس مسمار کئے گئے ہیں، جنوری میں اب تک متعدد صنعتی اداروں کے خلاف مقدمات بھی درج کئے گئے ہیں۔
جسٹس شاہد کریم نے ریمارکس دیئے کہ انڈسٹریز کیلئے خصوصی یونٹ ہونا چاہئے، سب سے زیادہ آلودگی تو انڈسٹریز سے پھیلتی ہے۔
اظہر صدیق ایڈووکیٹ نے بتایا کہ داتا دربار کے سامنے سڑک کی توسیع کے نام پر درخت کاٹے جا رہے ہیں، ایچ اے کے وکیل نے بتایا کہ ہم نے ایل ڈی اے کو اس بارے میں روکا انہوں نے بتایا کہ کاٹا نہیں بلکہ درختوں کو محفوظ بنایا جائے گا۔
جسٹس شاہد کریم نے حکم دیا کہ پی ایچ اے پارکس میں کاروباری سرگرمیاں بند کرے، یہ پی ایچ اے کا دائرہ اختیار نہیں۔
ممبر جوڈیشل کمیشن نے بتایا کہ نہرو پارک سو سال پرانا پارک تھا، وہ پارک بھی سارا تباہ کر دیا گیا، یہ کوئی بھی منصوبہ بغیر تشہیر کے شروع کر دیتے ہیں۔
جسٹس شاہد کریم نے کہا کہ میں حکم نامہ جاری کر دیتا ہوں کہ 800پارکس میں کوئی بھی کام ہو تو پہلے ممبران جوڈیشل کمیشن سے مشورہ کیا جائے۔
عدالت نے پی ایچ اے کو پارکس میں کاروباری سرگرمیاں روکنے، داتا دربار کے سامنے سے درختوں کی کٹائی کے معاملے کی انکوائری کا حکم دیتے ہوئے سماعت اگلے ہفتے تک کیلئے ملتوی کردی۔
