دبئی میں نئے سال کی آمد پر عوامی ٹرانسپورٹ استعمال کرنے کا نیا ریکارڈ قائم ہو گیا ہے اور سال نو کی رات 28 لاکھ 36ہزار سے زائد افراد نے پبلک ٹرانسپورٹ، ٹیکسی، آن لائن بکنگ اور مشترکہ سفری سہولیات استعمال کیں۔
دبئی روڈز اینڈ ٹرانسپورٹ اتھارٹی (آر ٹی اے) کے مطابق یہ تعداد گزشتہ سال 2025 کے مقابلے میں 13 فیصد سے زیادہ ہے جب نئے سال کی رات تقریباً 25 لاکھ افراد نے سفری سہولیات استعمال کی تھیں۔
آر ٹی اے کا کہنا ہے کہ نئے سال کی تقریبات کے دوران دبئی میٹرو کی ریڈ اور گرین لائنز پر تقریباً 12لاکھ 50 ہزار مسافروں نے سفر کیا، اسی طرح بسوں اور آن ڈیمانڈ بس سروس کے ذریعے 5 لاکھ سے زائد افراد نے آمد و رفت کی۔
رپورٹ کے مطابق نئے سال کی رات 6 لاکھ 62 ہزار مسافروں نے ٹیکسی کے ذریعے سفر کیا جبکہ 77ہزار افراد نے میرین ٹرانسپورٹ کے تحت کشتیوں کے ذریعے سفر کیا، اس کے علاوہ آن لائن بکنگ کے ذریعے چلنے والی گاڑیوں سے 2 لاکھ 86 ہزار سے زائد افراد نے آمد و رفت کی۔
دبئی حکام کے مطابق جامع ٹریفک اور ٹرانسپورٹ پلان کی بدولت شہریوں اور سیاحوں کو محفوظ اور آسان سفری سہولیات فراہم کی گئیں۔
