بھارت کا مقبول کامیڈی پروگرام دی گریٹ انڈین کپل شو قانونی مشکل میں پھنس گیا ہے اور میوزک رائٹس ادارے فونوگرافک پرفارمنس لمیٹڈ انڈیا نے شو کیخلاف بمبئی ہائیکورٹ میں کاپی رائٹ خلاف ورزی کا مقدمہ دائر کر دیا ہے۔
پی پی ایل کے مطابق نیٹ فلکس پر نشر ہونیوالے شو کے تیسرے سیزن میں بالی ووڈ کے تین مشہور گانے اجازت کے بغیر استعمال کئے گئے، ان میں فلم منا بھائی ایم بی بی ایس کا گانا ایم بولے تو، فلم کانٹے کا راما رے اور فلم دیسی بوائز کا صبح ہونے نہ دے شامل ہیں، یہ اقساط جون سے ستمبر کے درمیان نشر ہوئیں، درخواست گزار کا موقف ہے کہ ان گانوں کا استعمال بھارتی کاپی رائٹ ایکٹ کے تحت عوامی پرفارمنس اور عوام تک ترسیل کے زمرے میں آتا ہے کیونکہ شو پہلے لائیو آڈیئنس کے سامنے ریکارڈ کیا جاتا ہے جہاں موسیقی سنائی دیتی ہے اور بعد میں آن لائن لاکھوں ناظرین تک پہنچتا ہے، نومبر کے آغاز میں شو کے پروڈیوسرز کو نوٹس بھیجا گیا تھا۔
تاہم انکا جواب غیر تسلی بخش تھا اور موسیقی کا استعمال جاری رکھا گیا، ادارے نے عدالت سے مزید استعمال روکنے، ممکنہ آمدن کی تفصیلات طلب کرنے اور خلاف ورزی سے متعلق مواد ضبط کرنے کی درخواست کی ہے، معاملے کی سماعت جلد متوقع ہے۔
