جنیوا(شِنہوا)عالمی ادارہ صحت (ڈبلیو ایچ او) کی جاری کردہ رپورٹ کے مطابق اکتوبر سے عالمی سطح پر انفلوئنزا کی سرگرمی میں اضافہ دیکھنے میں آیا ہے جس میں انفلوئنزا اے وائرس سب سے زیادہ گردش کر رہے ہیں۔
تازہ ترین "سیزنل انفلوئنزا – عالمی صورتحال” اپ ڈیٹ میں بتایا گیا کہ یہ اضافہ شمالی نصف کرہ ارض میں سردیوں کے آغاز اور انفلوئنزا و دیگر سانس کے وائرس سے ہونے والے سانس کی شدید بیماریوں کے موسمی اضافے کے ساتھ مطابقت رکھتا ہے۔
اگرچہ عالمی انفلوئنزا کی سطح متوقع موسمی حدود کے اندر ہے تاہم بعض علاقوں میں خاص طور پر انفلوئنزا اے (ایچ 3 این 2) وائرس کے حوالے سے ابتدائی اضافہ اور معمول سے زیادہ شدید سرگرمی دیکھی گئی ہے۔
ڈبلیو ایچ او کے مطابق شمالی نصف کرہ کے کئی ممالک میں سانس کی شدید بیماریوں کی شرح میں اضافہ ہوا ہے جو انفلوئنزا، ریسپیریٹری سنسیشیئل وائرس (آر ایس وی) اور سانس کے دیگر عام وائرس کی موسمی وباؤں کی وجہ سے ہے۔
رپورٹ میں کہا گیا کہ ہر موسمی لہر کے آغاز کے وقت، دورانیے، شدت اور سنگینی کی پیش گوئی کرنا مشکل ہے کیونکہ یہ گردش کرنے والے وائرس کی قسم، آبادی کی مدافعت اور ماحولیاتی حالات پر منحصر ہوتا ہے۔
شمالی نصف کرہ کے کچھ ممالک نے فلو سیزن کے ابتدائی آغاز کی رپورٹ دی ہے۔ اگرچہ سرگرمی ابھی وبائی حد تک نہیں پہنچی جبکہ جنوبی نصف کرہ کے بعض حصوں میں گزشتہ چند ماہ میں وائرس کی سرگرمی اوسط سے زیادہ رہی ہے۔
معتدل، نیم گرم اور گرم علاقوں میں ایچ 3 این 2 وائرس کی شناخت میں اضافہ ہوا ہے جس سے یہ وائرس ستمبر کے آخر سے غالب رہا ہے۔
