پاکستان نے کہا ہے کہ بھارتی وزیر خارجہ امور کا بیان اشتعال انگیز، بے بنیاد اور غیر ذمہ دارانہ ہے ہم یکسر مسترد کرتے ہیں، ایسے اشتعال انگیز بیانات سے واضح ہوتا ہے کہ بھارت کو خطے میں امن، ہم آہنگی اور استحکام کی کوئی پروا نہیں، بھارتی قیادت کو پاکستان کی مسلح افواج پر بے بنیاد تبصرے کے بجائے فاشسٹ اور انتہا پسندانہ ہندوتوا نظریہ کی تحقیقات کرنی چاہئیں، ہندوتوا نظریہ نے بھارت میں ہجوم کے ہاتھوں قتل، ماورائے عدالت کارروائیوں، عبادت گاہوں واور املاک کی مسماری کو جنم دیا۔
ترجمان دفتر خارجہ طاہر حسین اندرابی نے کہا کہ پاکستان ایک ذمہ دار ریاست ہے اور اسکے تمام ادارے بشمول مسلح افواج قومی سلامتی کے مضبوط ستون ہیں، تمام ادارے ملک کی خودمختاری اور علاقائی سالمیت کے تحفظ کیلئے مکمل طور پر پرعزم ہیں، مئی 2025 میں پاکستان کی مسلح افواج نے پیشہ ورانہ مہارت، عزم اور ذمہ داری کیساتھ بھارتی جارحیت کا موثر جواب دیا جسے کوئی بھی پروپیگنڈا جھٹلا نہیں سکتا۔
ترجمان نے کہا کہ بھارتی قیادت کی جانب سے پاکستان کے ریاستی اداروں اور قیادت کو بدنام کرنے کی کوششیں ایک منظم اور مذموم پروپیگنڈا مہم کا حصہ ہیں جس کا مقصد خطے میں بھارت کے عدم استحکام پیدا کرنیوالے اقدامات سے توجہ ہٹانا ہے، بھارت پاکستان میں اپنی ریاستی سرپرستی میں جاری دہشتگردی سے بھی توجہ ہٹانے کی کوشش کر رہا ہے۔
بھارت اور اسکی قیادت مذہب کے نام پر پروان چڑھنے والی دہشت سے یرغمال بن چکے ہیں، پاکستان بقائے باہمی، مکالمے اور سفارت کاری پر یقین رکھتا ہے، پاکستان قومی مفادات اور خود مختاری کے تحفظ کیلئے متحد، مضبوط اور پرعزم ہے۔
