وفاقی وزیر اطلاعات عطاء اللہ تارڑ نے سوشل میڈیا پلیٹ فارمز پر موثر حکمت عملی کے تحت فیکٹ چیکنگ کا نظام وضع کرنے کی ضرورت پر زور فیک نیوز دنیا کا سب سے بڑا چیلنج ہے، ڈی ایٹ رکن ممالک کو اپنی متفقہ میڈیا پالیسی کے ذریعے غلط معلومات کا مقابلہ کرنا ہوگا۔
جاری بیان کے مطابق ہفتے کو وفاقی وزیر سے سیکرٹری جنرل ڈی ایٹ برائے اقتصادی تعاون کے ایمبیسیڈر اسیاکا عبدالقادر امام نے ملاقات کی جس میں ڈی ایٹ رکن ممالک کے درمیان باہمی تعاون بالخصوص میڈیا شعبے میں تعلقات، فیک نیوز سمیت اہم عالمی امور پر تبادلہ خیال کیا گیا۔
وفاقی وزیر اطلاعات نے کہا کہ فیک نیوز پر مکمل کنٹرول کے بغیر ڈی ایٹ ممالک کا مشترکہ بیانیہ مضبوط نہیں ہوسکتا، انہیں اپنی متفقہ میڈیا پالیسی کے ذریعے غلط معلومات کا مقابلہ کرنا ہوگا۔
ملاقات میں ڈی ایٹ ممالک کے درمیان ثقافتی روابط کے فروغ پر تبادلہ خیال کرتے ہوئے وفاقی وزیر نے کہا کہ ثقافتی تعاون سے خطے میں ہم آہنگی اور مثبت امیج کا فروغ ممکن ہے، ثقافت، ابلاغ اور ٹیکنالوجی کے اشتراک سے ڈی ایٹ ممالک کے عوام کو مزید قریب لایا جاسکتا ہے۔
انہوں نے عالمی سطح پر اقتصادی ترقی اور خطے کے امن کیلئے ڈی ایٹ کے سیکرٹری جنرل کے موثر کردار کو سراہتے ہوئے کہا کہ ان کی رہنمائی اور تجربے سے ڈی ایٹ کے مقاصد کی تکمیل میں بھرپور کردار ادا کریں گے۔
اس موقع پر سیکریٹری جنرل ایمبیسیڈر اسیاکا عبدالقادر امام نے کہا کہ ڈی ایٹ کے رکن ممالک کی کامیابی کا دارومدار اس بات پر ہے کہ وہ ایک دوسرے کی ترقی میں کس حد تک معاون ثابت ہوتے ہیں۔
انہوں نے کہا کہ میڈیا کے شعبے میں ایک دوسرے کے تجربات سے سیکھنے، مشترکہ ٹریننگز اور ورکشاپس کا انعقاد ناگزیر ہے۔
انہوں نے زور دیا کہ عالمی سطح پر مضبوط، مثبت بیانیہ کی تشکیل کیلئے ڈی ایٹ کے پلیٹ فارم پر تعاون کو مستحکم کرنا ہوگا۔
