وزیراعلی پنجاب مریم نواز نے فلپائنی سرمایہ کاروں کو سرمایہ کاری کی پیشکش اور اشتراک کار مزید مضبوط بنانے پر اتفاق کیا ہے۔
ذرائع کے مطابق جمعہ کو فلپائنی سفیر ڈاکٹر ایمینوئیل آر فرنینڈز نے وزیراعلی پنجاب سے ملاقات کی جس میں دوطرفہ تعلقات، سرمایہ کاری، موسمیاتی تبدیلی، دفاعی تعاون اور عوامی روابط، سیاسی، آئینی اور پارلیمانی تعاون پر تفصیلی تبادلہ خیال کیا گیا۔
دونوں رہنمائوں نے فلپائن اور پنجاب کے مابین اشتراک کار مزید مضبوط بنانے پر اتفاق کیا۔
وزیر اعلی مریم نواز نے فلپائن کو 2026ء کی آسیان چیئرمین شپ ملنے پر مبارکباد پیش کرتے ہوئے فلپائنی سرمایہ کاروں کو پنجاب میں سرمایہ کاری کی پیشکش کی اور مکمل تعاون و سہولیات کی یقین دہانی کرائی۔
مریم نوازنے کہا کہ پاکستان اور فلپائن کے درمیان دوستی 76برسوں پر محیط ایک مضبوط اور باوقار رشتہ ہے، لاہور اور پنجاب کی سرزمین اپنے دروازے ہمیشہ دوست ممالک کیلئے کھلے رکھتی ہے، پاکستان اور فلپائن کے درمیان روحانی و تہذیبی اقدار، امن، انسانیت اور ہم آہنگی ہمارا مشترکہ ورثہ ہیں۔
انہوں نے کہا کہ پاکستان اور فلپائن کے مابین 25ایم او یوز اور 2022ء کا دفاعی تعاون کا معاہدہ تعلقات کو ایک نئی جہت دے رہا ہے۔
وزیر اعلی نے فلپائن میں حالیہ زلزلوں اور طوفان سے انسانی جانوں کے ضیاع پر تعزیت کا اظہار کرتے ہوئے کہا کہ پاکستان دکھ کی گھڑی میں فلپائنی عوام کیساتھ کھڑا ہے، فلڈز اور ٹائفونز نے پاکستان اور فلپائن دونوں کو یکساں طور پر متاثر کیا ہے۔
وزیراعلی نے کہا کہ لاس اینڈ ڈیمج فنڈ کی تشکیل میں پاکستان اور فلپائن کا کردار قابل فخر ہے، فلپائن کی ڈیزاسٹر مینجمنٹ مہارت سے پنجاب ادارہ جاتی تبادلوں کے ذریعے استفادہ کرنا چاہتا ہے اور پائیدار امن و ڈی ریڈیکلائزیشن اقدامات کی مکمل حمایت کرتا ہے۔
انہوں نے کہا کہ پنجاب پاکستان کی معاشی ریڑھ کی ہڈی ہے، 60فیصد قومی جی ڈی پی اسی صوبے سے بنتی ہے، آئی ٹی، توانائی، زراعت ، فوڈ پروسیسنگ، فارماسیوٹیکل، آٹو پارٹس، لاجسٹکس اور کنسٹرکشن سیکٹر میں سرمایہ کاری کے وسیع مواقع موجود ہیں۔
انہوں نے بتایا کہ ایس آئی ایف سی اور پی بی آئی ٹی سرمایہ کاروں کو ون ونڈو سہولت اور پالیسی استحکام فراہم کر رہے ہیں، پنجاب کے سپیشل اکنامک زونز میں عالمی معیار کا انفراسٹرکچر، ٹیکس مراعات اور کسٹمز سہولتیں میسر ہیں، پاکستان دفاعی تربیت، جوائنٹ مشقوں، انسدادِ دہشت گردی اور انٹلیجنس شیئرنگ کے شعبوں میں مزید تعاون بڑھانے کیلئے تیار ہے۔
وزیراعلی نے کہا کہ ہزاروں فلپائنی پاکستان میں اور بڑی تعداد میں پاکستانی فلپائن میں رہتے ہیں جو باہمی دوستی کو مضبوط بناتے ہیں۔
مریم نوازنے دوستی، اعتماد اور مشترکہ اقدار پر قائم رشتے کو مزید مضبوط بنانے ، ہر شعبے میں باہمی شراکت داری نئی بلندیوں تک لے جانے کے عزم کا اعادہ کرتے ہوئے کہا کہ لاہور کا یونیسکو کرییٹیو سٹی اور ای سی او ٹورازم کیپٹل 2027ء کا اعزاز ثقافتی، سیاحتی تعاون کے نئے دروازے کھولے گا۔
