الیکشن کمیشن نے انتخابی ضابطہ اخلاق کی خلاف ورزی پر دو وفاقی وزراء کو طلب کرلیا۔
وزیر مملکت داخلہ طلال چودھری کو این اے 96 فیصل آباد میں ہونیوالے ضمنی انتخاب کے سلسلے میں ضابطہ اخلاق کی خلاف ورزی طلب کرتے ہوئے 50 ہزار روپے جرمانہ بھی عائد کردیا جبکہ وزیر توانائی اویس احمد لغاری کو بھی طلب کر لیا گیا۔
الیکشن کمیشن نے طلال چودھری کو نوٹس جاری کرکے 24 نومبر کو طلب کر لیاجبکہ حلقے سے مسلم لیگ ن کے امیدوار طلال چودھری کے بھائی بلال چودھری کو بھی نوٹس جاری کیا گیا۔
الیکشن کمیشن نے ڈسٹرکٹ مانیٹرنگ افسر کی رپورٹ پر نوٹس جاری کیا، ڈسٹرکٹ مانیٹرنگ افسر نے کارنر میٹنگ میں شرکت پر وزیر مملکت اوران کے بھائی امیدوار کو 50 ہزار روپے جرمانہ کیا تھا۔
الیکشن کمیشن کے مطابق وزیر مملکت طلال چودھری کی اپنے بھائی کے انتخابی مہم میں شرکت ضابطہ اخلاق کی خلاف ورزی ہے۔الیکشن کمیشن نے بلال چودھری کو جرمانہ ادا کرنے کے احکامات جاری کرتے ہوئے کہاکہ جرمانہ ادا نہ کرنے کی صورت میں کیس الیکشن کمیشن کو بھیج دیا جائیگا۔
ڈسٹرکٹ مانیٹرنگ آفیسر فیصل آباد نے سیکرٹری الیکشن کمیشن کو مراسلہ ارسال کیاہے جس میں کہا گیا کہ طلال چودھری کی جانب سے ضابطہ اخلاق کی مسلسل خلاف ورزی کی جا رہی ہے، انہیں فون پر آگاہ کیا گیا کہ وہ ضابطہ اخلاق کی خلاف ورزی کر رہے ہیں، دونوٹسز کے باوجود طلال چودھری نے ضابطہ اخلاق کی پاسداری نہیں کی جس کے بعد ان پر 50 ہزار روپے جرمانہ عائد کردیا گیا، معاملہ مزید کارروائی کیلئے الیکشن کمیشن ارسال کر رہے ہیں۔
دوسری طرف ڈسٹرکٹ مانیٹرنگ افسر ڈی جی خان نے این اے 185 میں امیدوار محمود لغاری کی الیکشن مہم میں شرکت پر وفاقی وزیر اویس لغاری کو نوٹس جاری کردیا، ڈسٹرکٹ مانیٹرنگ افسر کا کہنا ہے کہ بطور وفاقی وزیر الیکشن مہم میں حصہ لیکر اویس لغاری نے ہدایات کی خلاف ورزی کی ہے، اویس لغاری ضابطہ اخلاق کی خلاف ورزی پر پیش ہو کر اپنی پوزیشن واضح کریں۔
ترجمان الیکشن کمشنر پنجاب نے کہا ہے کہ دونوں کو وضاحت پیش کرنے کی ہدایت کی گئی ہے، کسی وزیر یا مشیر کو انتخابی مہم چلانے کی اجازت نہیں ہے۔
الیکشن کمشنر پنجاب نے کہاہے کہ ضابطہ اخلاق کی خلاف ورزی پر فوری ایکشن لیا جائیگا، شفاف اور غیرجانبدار انتخابات کو ہر صورت یقینی بنایا جائیگا۔
