وزیراعلی پنجاب مریم نواز نے کہا ہے کہ بچوں کا جنسی استحصال، بدسلوکی اور تشدد انسانیت کیخلاف جرم ہے، جرائم کو جڑ سے اکھاڑ پھینکیں گے۔
بچوں کے جنسی استحصال، بدسلوکی اور تشدد کی روک تھام و بحالی کے عالمی دن پر جاری بیان میں مریم نواز نے کہا کہ بچوں کیساتھ جنسی استحصال، بدسلوکی اور تشدد صرف جرم نہیں انسانیت کیخلاف بغاوت ہے، بچے مجھے پیارے اور میری ریڈ لائن ہیں جن کی حفاظت ہمارا فرض ہے۔
انہوں نے کہا کہ بچوں کے خلاف جرائم میں ملوث لوگ سماج کے ناسور ہیں جنہیں جڑ سے اکھاڑ پھینکیں گے۔
انہوں نے بتایا کہ صوبے میں بچوں کو تحفظ دینے کیلئے پاکستان کا پہلا ورچوئل سینٹر برائے چائلڈ سیفٹی قائم کیا گیا ہے، ڈیجیٹل ٹیکنالوجی اور مستحکم گورننس کو ملا کر بچوں اور شہریوں کی حفاظت کا ایک محفوظ نظام بنا دیا ہے، پنجاب کا ورچوئل سینٹر برائے چائلڈ سیفٹی ہزاروں بچھڑے ہوئے بچوں اور بزرگوں کو ان کے خاندانوں سے ملا چکا ہے۔
انہوں نے کہا کہ پنجاب میں کسی بچے کے لاپتہ ہونے کی صورت میں ورچوئل سینٹر برائے چائلڈ سیفٹی سے فوری رابطہ کیا جائے ۔
