وفاقی کابینہ نے 27ویں آئینی ترمیم کی منظوری دے دی۔
ہفتے کو وزیراعظم شہباز شریف نے آذربائیجان کے شہر باکو سے بذریعہ ویڈیو لنک وفاقی کابینہ کے اجلاس کی صدارت کی۔
اجلاس میں خواجہ آصف، بلال اظہر کیانی، رانا تنویر، رانا مبشر، عون چوہدری ، ڈاکٹر شہزرہ منصب، ریاض حسین پیر زادہ، قیصر احمد شیخ، ملک رشید احمد، اٹارنی جنرل منصور عثمان اعوان شریک ہوئے۔
وزیر قانون اعظم نذیر تارڑ اور اٹارنی جنرل منصور عثمان اعوان نے کابینہ کو27ویں آئینی ترمیم پر بریفنگ دی۔اجلاس میں پیپلز پارٹی کی تجاویز کا بھی جائزہ لیا گیا۔
بعد ازاں وفاقی کابینہ نے 27 ویں آئینی ترمیم کی منظوری دے دی۔ ذرائع کے مطابق آئینی ترمیم میں آئین کی مختلف شقوں میں کل 46 ترامیم کی جائیں گی۔
ترامیم میں آئینی کورٹ بنانے، ججز کی ٹرانسفر اور آرٹیکل 243میں تبدیلی ہوگی۔
ترمیم کے مطابق آرمی، ایئر فورس اور نیوی کے بعد اب چوتھی فورس آرمی راکٹ فورس (اے آر ایف سی)ہوگی، چیف آف آرمی سٹاف کمانڈر آف ڈیفنس فورسز بھی کہلائیں گے، تمام کو آرڈنیشن چیف آف آرمی سٹاف خود بلحاظ کمانڈر آف ڈیفنس فورسز کیا کریں گے۔
ترمیم کے تحت راکٹ فورس میں اسٹرٹیجک پلان ڈویژن (ایس پی ڈی)کو بھی شامل کیا گیا ہے، قبل ازیں ایس پی ڈی چیئرمین جوائنٹ آف سٹاف کے ماتحت کام کرتی تھی، چیئرمین جوائنٹ آف سٹاف کے عہدے کی جگہ اب کمانڈر آف ڈیفنس فورسز آئیگی۔
