اسلام آباد: مشیر وزیراعظم برائے سیاسی امور رانا ثنا اللہ نے کہا ہے کہ بلاول بھٹو کی بات پر ردعمل دینے کی ضرورت نہیں، جلسے میں بات جوش خطابت میں کہی، کینالز منصوبے سے سندھ کو نقصان نہیں پہنچے گا ، صوبے کا ایک بوند پانی چوری کرنے کا ارادہ نہیں، پی ٹی آئی اپنے معاملات بہتر جیل عملے سے تعاون کرے، فہرست کے مطابق لوگ ملاقات کیلئے جائیں۔
نجی ٹی وی سے گفتگو کرتے ہوئے رانا ثنا اللہ نے کہا کہ سندھ حکومت کینالز معاملے پر بات کرنے کو تیار ہے، یہ بات وزیر اعظم کے نوٹس میں لائی گئی ہے۔ انہوں نے کہا کہ وزیر اعظم معاملے پر مناسب فیصلہ کریں گے۔ انہوں نے کہا کہ کینالز منصوبے سے سندھ کو کوئی نقصان نہیں پہنچے گا، سندھ کا ایک بوند پانی بھی چوری کرنے کا ارادہ نہیں ہے۔
انہوں نے کہا کہ بلاول بھٹو نے جلسہ میں بات جوش خطابت میں کی اور جوش خطابت میں بہت ساری باتیں ہو جاتی ہیں، اس بات پر رد عمل دینے کی ضرورت نہیں۔انہوں نے کہا کہ بیانات ایک دائرے میں ہونے چاہئیں، دوسروں کی عزت و احترام ہونا چاہئے۔
ایک سوال کے جواب میں انہوں نے کہا کہ پی ٹی آئی کو چاہئے اپنے معاملات بہتر ،جیل عملے سے تعاون کرے جن لوگوں کا نام فہرست میں ہے وہی ملاقات کیلئے جائیں دیگر لوگ کیوں چلے جاتے ہیں؟۔انہوں نے کہا کہ معاملات دونوں اطراف ہی کو بہتر کرنے کی ضرورت ہے، خواہش ہے بانی پی ٹی آئی سے ملاقات کے معاملے پر کوئی مسئلہ نہ ہو۔
