اسلام آباد: ترجمان دفتر خارجہ شفقت علی خان نے کہا ہے کہ اپنی سرحدوں کو محفوظ بنانا ہماری پالیسی ،غیر قانونی مقیم غیر ملکیوں کی واپسی پر عملدرآمد کر رہے ہیں،امریکہ کی جانب سے بگرام میں ائیر بیس قائم کرنے کا معاملہ سوشل میڈیا کی افواہیں ہیں، بھارت میں وقف املاک قوانین میں تبدیلی مسلمانوں کو دیوار کے ساتھ لگانے کی کوشش ہے، امریکی ٹیرف سے ترقی پذیر ممالک متاثر ہو رہے ہیں، معاملہ حل ہونا چاہئے۔
جمعرات کو ہفتہ وار میڈیا بریفنگ دیتے ہوئے ترجمان دفتر خارجہ شفقت علی خان نے بتایا کہ امریکہ ہماری بڑی برآمدی منزل ہے، امریکہ کی جانب سے تیز رفتار ٹیرف تبدیلیاں دیکھ رہے ہیں، ٹیرف سے ترقی پذیر ممالک متاثر ہو رہے ہیں، معاملہ حل ہونا چاہئے،معاملے پر وزیراعظم نے سٹیئرنگ کمیٹی قائم کی ہے جو امریکی حکام کیساتھ مذاکرات کرے گی۔
انہوں نے بتایا کہ امریکہ میں تعلیمی ویزوں کی معطلی بارے بھی امریکہ کیساتھ رابطے میں ہیں، امریکہ کی جانب سے حال ہی میں ختم کیا گیا یوگریڈ پروگرام پاکستان طالبعلموں کیلئے سنگ میل کی حیثیت رکھتا تھا۔انہوں نے کہا کہ متحدہ عرب امارات نے پاکستانی شہریوں پر ویزا پابندی عائد نہیں کی ،سعودی عرب نے 14ممالک کیلئے ویزوں پر عارضی پابندی عائد کی ہے، سعودی عرب کیساتھ رابطے میں ہیں،معلومات اکھٹی کی جارہی ہیں۔
ترجمان نے کہا کہ برطانیہ سے پاکستان لائے جانیوالے قیدی کی سماجی تقریبات میں شرکت کی اطلاعات دیکھیں گے، تہورپرانا پر ہمارا ریکارڈ کہتا ہے انہوں نے گزشتہ 2برس سے پاکستانی شہریت کی تجدید نہیں کی۔ترجمان دفتر خارجہ نے کہا کہ چین پاکستان کا تزویراتی اور قریبی شراکت دار ہے، چینی شہریوں کا تحفظ ہماری بنیادی ذمہ داری ہے۔
انہوں نے کہا کہ ایران ہمارا ایک اہم ہمسایہ اور قریبی دوست ہے، ہمارے تعلقات انتہائی اہم ہیں،جے سی پی او ایک پیچیدہ مسئلے کے حل کی عمدہ مثال ہے، ہم تمام مسائل کے بات چیت کے زریعہ حل کے خواہشمند ہیں۔ترجمان نے بتایا کہ پاکستان کے افغانستان کیساتھ اہم تعلقات ہیں، حال ہی میں نمائندہ خصوصی کا دورہ کابل کافی اہم رہا، اس دوران متعدد موضوعات پر تبادلہ خیال ہوا۔
انہوں نے کہا کہ پاکستان ہمیشہ مشکل وقت میں اپنے افغان بہنوں بھائیوں کے ساتھ کھڑا رہا، تاہم اپنی سرحدوں کو محفوظ بنانا ہماری پالیسی ہے،ہم غیر قانونی مقیم غیر ملکیوں کی واپسی پر عملدرآمد کر رہے ہیں۔ انہوں نے کہا کہ خارجہ پالیسی وفاق کا معاملہ ہے، صوبائی حکومت کے افغانستان سے مذاکرات کے ٹی او آرز کا معاملہ افغان ڈیسک سے چیک کریں گے۔
ترجمان نے کہا کہ امریکہ کی جانب سے بگرام میں ائیر بیس قائم کرنے کا معاملہ سوشل میڈیا کی افواہیں ہیں تاہم یہ افغانستان اور امریکی حکومتوں کا آپسی معاملہ ہے۔ایک سوال پر انہوں نے کہا کہ افغانستان میں چھوڑے گئے جدید امریکی ہتھیار ہماری سکیورٹی فورسز پر حملوں میں استعمال ہو رہے ہیں، یہ معاملہ بارہا امریکہ کے ساتھ اٹھایا ہے، نائب وزیراعظم کے امریکی وزیر خارجہ کیساتھ حالیہ ٹیلیفونک گفتگو میں بھی یہ بات زیربحث آئی ہے۔
انہوں نے کہا کہ بھارت میں وقف قوانین وہاں مسلمانوں کا بنیادی حق ہے، بھارت میں وقف املاک قوانین میں تبدیلی مسلمانوں کو دیوار کے ساتھ لگانے کی کوشش ہے، بھارتی اقدامات امتیازی سلوک اور اقلیتوں کے حقوق کی خلاف ورزی ہیں۔
