اسلام آباد: وزیر داخلہ محسن نقوی نے کہا ہے کہ دہشت گردی صرف پاکستان کی جنگ نہیں، نمٹنے کیلئے عالمی برادری تعاون کرے، پاکستان منرلز انویسٹمنٹ فورم کے ذریعے امریکی کمپنیاں پاکستان میں سرمایہ کاری کے مواقع سے فائدہ اٹھا سکتی ہیں۔
جاری بیان کے مطابق امریکی وفد کے سربراہ و محکمہ خارجہ کے سینئر عہدیدار نے وزیر داخلہ محسن نقوی سے ملاقات کی جس میں پاک امریکہ تعلقات سمیت باہمی دلچسپی کے امور اور دو طرفہ تعاون پر تبادلہ خیال کیا گیا، دہشت گردی، اسمگلنگ اور انسدادِ منشیات کے شعبوں میں باہمی اشتراک بڑھانے پر بھی بات چیت کی گئی۔
امریکی عہدیدار نے جعفر ایکسپریس پر دہشت گردوں کے حملے کی مذمت ،جانی نقصان پر اظہار افسوس کیا اور مطلوب دہشت گرد شریف اللہ کی گرفتاری میں تعاون پر پاکستان کا شکریہ ادا کیا۔
وزیر داخلہ نے امریکی عہدیدار کو انسدادِ دہشت گردی کے سلسلے میں اٹھائے گئے اقدامات سے آگاہ کرتے ہوئے کہا کہ پاکستان منرلز انویسٹمنٹ فورم کے ذریعے امریکی کمپنیاں پاکستان میں سرمایہ کاری کے مواقع سے فائدہ اٹھا سکتی ہیں، جون میں مشترکہ کانٹر ٹیررازم ڈائیلاگ کا انعقاد انسدادِ دہشت گردی میں تعاون بڑھانے کے لیے اہم ثابت ہو گا۔
انہوں نے کہا کہ دہشت گردی صرف پاکستان کی جنگ نہیں، دہشت گردی سے نمٹنے کیلئے عالمی برادری کو پاکستان سے تعاون کرنا ہو گا، پاکستان کو بھی امریکہ کی طرح غیر قانونی تارکینِ وطن کے مسائل کا سامنا ہے۔
