اسلام آباد: وزیراعظم شہباز شریف نے پاکستان آذر بائیجان کے درمیان دستخط شدہ مفاہمتی یادداشتوں و معاہدوں کو جلد عملی جامہ پہنانے کی ہدایت کر تے ہوئے صدر آذربائیجان کے پاکستان میں 2ارب ڈالر سرمایہ کاری کے اعلان بارے کمیٹی بھی قائم کردی۔
منگل کو وزیر اعظم شہباز شریف کی زیر صدارت دورہ آذربائیجان پر جائزہ اجلاس کا انعقاد ہوا جس میں نائب وزیر اعظم و وزیر خارجہ اسحاق ڈار، وفاقی وزراء احد خان چیمہ، جام کمال خان، عبدالعلیم خان، ڈاکٹر مصدق ملک، معاون خصوصی طارق فاطمی اور متعلقہ اعلی حکام نے شرکت کی۔
اجلاس میں وزیر اعظم کو باکو میں منعقدہ مشترکہ بزنس فورم بارے آگاہ کرتے ہوئے بتایا گیا کہ فورم میں 83پاکستانی جبکہ 101آذربائیجان کی کمپنیوں نے شرکت کی،دورے کے دوران دونوں ممالک کے مابین دو طرفہ تعاون کے فروغ بارے 13مفاہمتی یادداشتوں و معاہدوں پر دستخط ہوئے تھے۔
وزیراعظم نے دستخط شدہ مفاہمتی یادداشتوں و معاہدوں کو جلد عملی جامہ پہنانے ،وزارت تجارت کو دونوں ممالک کے مابین موجودہ تجارتی حجم 2ارب ڈالر پر پہنچانے کیلئے جامع لائحہ عمل پیش کرنے کی ہدایت کی ۔ وزیراعظم نے آذربائیجان کے صدر کے پاکستان میں 2ارب ڈالر سرمایہ کاری کے اعلان پرنائب وزیر اعظم اسحاق ڈار کی زیر نگرانی کمیٹی بھی قائم کر دی جو توانائی و بنیادی ڈھانچے کے شعبوں میں معاہدوں کیلئے تیاری یقینی بنائے گی۔
وزیراعظم نے آذری صدر کے آئندہ ماہ متوقع دورہ پاکستان سے قبل ترجیحی بنیادوں پر تمام تیاریاں مکمل کرنے کی ہدایت کی جبکہ آذربائیجان سمیت ایسے تمام ممالک جہاں پاکستان کیساتھ تجارت کی وسیع استعداد موجود ہے میں ٹریڈ افسران کی تعیناتی کی ہدایت کی۔
اجلاس سے گفتگو کرتے ہوئے وزیراعظم نے کہا کہ پاکستان اور آذربائیجان کے مابین دیرینہ برادرانہ تعلقات ہیں جو دہائیوں پر محیط ہیں، پاکستان اور وسط ایشیائی ریاستوں کے مابین تجارت و سرمایہ کاری کی وسیع استعداد سے بھرپور فائدہ اٹھانے کیلئے ترجیحی بنیادوں پر اقدامات کر رہے ہیں۔
