اسلام آباد: نائب وزیراعظم و وزیر خارجہ اسحاق ڈار نے غزہ کے لوگوں کو بے گھر کرنے کی تجویز کو انتہائی پریشان کن و غیر منصفانہ قراردیتے ہوئے کہا ہے کہ فلسطینی سر زمین فلسطینی عوام کی ہے،پاکستان خودمختار فلسطینی ریاست کے قیام کی حمایت جاری رکھے گا۔
ان کیالات کا اظہار انہوں نے ایرانی ہم منصب سید عباس عراقچی سے ٹیلی فونک گفتگو کے دوران کیا ۔دوران گفتگو دونوں وزرا نے مشرق وسطی کی صورتحال پر خصوصی توجہ مرکوز کی، فریقین نے غزہ میں فلسطینیوں کی مسلسل حالت زار پر تبادلہ خیال کیا۔
اس موقع پروزیر خارجہ نے اس معاملے پر غور و خوض کیلئے او آئی سی وزرائے خارجہ کا غیر معمولی اجلاس بلانے کیلئے پاکستان کی حمایت سے بھی آگاہ کیا۔
ترجمان دفتر خارجہ شفقت علی خان کے مطابق اسحاق ڈار نے زور دیا کہ مسئلہ فلسطین کا اقوام متحدہ سلامتی کونسل قراردادوں کے مطابق دو ریاستی حل ہی واحد قابل عمل اور منصفانہ آپشن ہے،، ایک ایسی فلسطینی ریاست جس کا دارالحکومت القدس الشریف ہو ۔ترجمان دفتر خارجہ کے مطابق فریقین نے آنے والے دنوں میں ان پیش رفتوں پر قریبی رابطہ برقرار رکھنے پر اتفاق کیا۔
