اسلام آباد: وزیراعظم شہباز شریف نے نجکاری عمل تیز کر کے معینہ مدت میں اداروںکی نجکاری یقینی بنانے کی ہدایت کرتے ہوئے کہا ہے کہ اداروں کو عوام کے قیمتی وسائل کے مزید نقصان کی اجازت نہیں دوںگا،ملکی ترقی کیلئے سب کو مل کر کام کرنا ہوگا، نجکاری عمل میں قانونی رکاوٹیں دور کرنے کیلئے اچھی شہرت کے وکلاء کی خدمات لی جائیں۔
جمعرات کو وزیر اعظم شہباز شریف کی زیر صدارت سرکاری اداروں کی نجکاری کے عمل اور نگرانی بارے بنائے گئے ٹاسک مینجمنٹ سسٹم پر جائزہ اجلاس کا انعقاد ہوا جس میں وفاقی وزراء عبدالعلیم خان، محمد اورنگزیب، رانا تنویر حسین، احد خان چیمہ اور متعلقہ اعلی حکام نے شرکت کی۔
اجلاس میں وزیر اعظم کو نجکاری بارے بنائے گئے ٹاسک مینجمنٹ سسٹم کا جائزہ پیش کیا گیا،اجلاس کو مختلف اداروں کی نجکاری کی معینہ مدت بارے آگاہ کیا گیا۔اجلاس کو بتایا گیا کہ وفاقی حکومت کے اداروں کی نجکاری کو تین مرحلوں میں تقسیم کیا گیا ہے،پہلے مرحلے میں 10ادارے، دوسرے مرحلے میں 13جبکہ تیسرے مرحلے میں باقی ماندہ اداروں کی نجکاری یقینی بنائی جائے گی۔
اجلاس میں نجکاری کے عمل کی نگرانی کیلئے بنائے گئے ٹاسک مینجمنٹ ڈیش بورڈ کا بھی جائزہ لیاگیا۔وزیر اعظم نے نجکاری کا عمل تیز کرکے معینہ مدت میں اداروںکی نجکاری یقینی بنانے کی ہدایت کرتے ہوئے کہا کہ پاکستان کی ترقی کیلئے سب کو مل کر کام کرنا ہوگا، بروقت ضروری اصلاحات سے معیشت کی بہتری کی جانب تیزی سے گامزن ہیں۔
انہوں نے کہا کہ اداروں کو عوام کے قیمتی وسائل کا مزید نقصان کرنے کی اجازت نہیں دوںگا، ملکی اداروں کی نجکاری حکومت کے اڑان پاکستان اقدام کا حصہ ہے،متعین کردہ اداروں کی نجکاری کے عمل کو شفافیت پر سمجھوتہ کئے بغیر تیز کیا جائے،نجکاری عمل میں قانونی رکاوٹیں دور کرنے کیلئے اچھی شہرت کے وکلاء کی خدمات لی جائیں۔ انہوں نے کہا کہ نجکاری عمل کی خود نگرانی کر رہا ہوں، کسی قسم کا تعطل قبول نہیں ہے۔
انہوں نے کہا کہ حکومت کا کام کاروبار کرنا نہیں، کاروبار و سرمایہ کاری کیلئے پالیسی اقدمات اور سہولت کی فراہمی ہے۔
