لاہور: پنجاب کے میدانی علاقوں میں شدید دھند کے باعث موٹروے کو کئی مقامات سے بند کردیا گیا۔ ترجمان موٹروے پولیس کے مطابق دھند کے باعث موٹروے ایم 2لاہور سے ہرن مینار جبکہ ایم 3فیض پور سے سمندری تک بند کردی گئی، لاہور سیالکوٹ موٹروے ایم 11پر بھی ٹریفک کا داخلہ بند کردیا گیا۔
ترجمان نے کہا ہے کہ موٹر ویز بند کرنے کا مقصد حادثات سے بچائو اور جان و مال کا تحفظ ہے۔ شہریوں سے درخواست ہے کہ دھند کہ اوقات میں غیر ضروری سفر سے گریز کریں،اپنا سفر دن کی روشنی میں مکمل کر یں ، سفر کے بہترین اوقات دن 10 سے شام 6 بجے تک ہیں۔
ترجمان نے ہدایت کی کہ گاڑی میں فوگ لائٹس کا استعمال کریں، تیز رفتاری سے گریز کریں اور اگلی گاڑی سے مناسب فاصلہ معمول سے زیادہ رکھیں۔ ترجمان نے کہا کہ سفر شروع کرنے سے قبل موٹروے پولیس ہیلپ لائن 130یا نیشنل ہائی ویز اینڈ موٹروے پولیس کے آفیشل سوشل میڈیا اکائونٹ سے بھی تازہ ترین معلومات حاصل کی جاسکتی ہیں ۔
