راولپنڈی: سابق وزیراعظم عمران خان کی ہمشیرہ علیمہ خان نے کہا ہے کہ اگر پیغام رسانی جرم ہے تو کل پوری قوم ملزم بنے گی، میڈیا ٹاک سے کون سی دہشت گردی ہے، آئین اظہار رائے کی اجازت دیتا ہے، ہم ظلم اور خوف کی فضا ختم کر کے رہیں گے۔
راولپنڈی کچہری میں میڈیا سے گفتگو کرتے ہوئے علیمہ خان نے کہا کہ مجھ پر الزام ہنگامے کا نہیں بلکہ عمران خان کا پیغام پہنچانے کا ہے، میں نے 10سے 15صحافیوں اور یوٹیوبرز کو عمران خان کا پیغام پہنچایا، میڈیا نے تو پوری قوم تک پہنچا دیا پھر تو وہ بھی میرے ساتھ ملزم ہوگیا، انہیں بھی میرے ساتھ مقدمے میں شامل کرنا چاہئے۔
انہوں نے کہا کہ آج اگر عمران خان کا پیغام پہنچانے پر میں ملزم ہوں تو پھر کل پوری قوم ملزم بنے گی، کل جس کسی کی بات پسند نہیں آئیگی اس کیخلاف مقدمہ بنا دیا جائے گا، بتایا جائے میڈیا ٹاک سے کون سی دہشت گردی نکلتی ہے، یہی آئینی قانونی نکتہ ہم نے عدالت میں چیلنج کیا ہے۔
انہوں نے کہا کہ ہم پر 60سے 70مقدمات ہیں، کبھی پنڈی تو کبھی اسلام آباد سے وارنٹ نکال دیئے جاتے ہیں، یہ ظلم اور خوف کی فضاء ختم کرنا ہوگی، ہم ڈرنے والے نہیں۔انہوں نے کہا کہ ہماری ترجیح عمران خان اور ان کے مقدمات ہیں، ہم جیل میں ملاقات کرنے ٹرائل پر جاتے ہیں اور وارنٹ نکال دیئے جاتے ہیں، یہ ظلم کی فضا ہم عدالتوں میں چیلنج کر کے ختم کروائیں گے، آئین پاکستان مجھے اور ہر پاکستانی کو اظہار رائے کی آزادی دیتا ہے۔
