واشنگٹن: امریکی صدر ڈونلڈ ٹرمپ نے بچوں میں کینسر کے علاج اور تحقیق کے لیے آرٹیفیشل انٹیلیجنس (اے آئی )کے استعمال کا اعلان کرتے کینسر ریسرچ سے متعلق ایگزیکٹو آرڈر پر دستخط کر دیے ۔ صدر ٹرمپ نے میڈیا سے گفتگو کرتے ہوئے کہا کہ اے آئی کا استعمال کینسر جیسے امراض کے خلاف جنگ میں مثبت اور دیرپا نتائج دے گا، میرا وژن صرف امریکہ کو اقتصادی طاقت بنانا نہیں بلکہ اسے سائنس، ٹیکنالوجی اور تحقیق میں بھی قیادت دلانا ہے۔
انہوں نے کہا کہ امریکی معیشت اور سائنسی میدان میں انقلاب لانے کے لیے اے آئی کو مزید بہتر بنایا جائے گا، حکومت نے عوام کو اے آئی اور دیگر مہارتیں سکھانے کے لیے 500 ملین ڈالر مختص کیے ہیں۔
انہوں نے کہا کہ موجودہ حکومت کی پالیسیوں کے نتیجے میں سرمایہ کاروں کا اعتماد بحال ہوا ہے، ملک میں روزگار کے مواقع بڑھیں گے اور ہمیں ہنرمند افراد کی اشد ضرورت ہوگی۔
ان کا کہنا تھا کہ صرف 8 ماہ میں میری حکومت نے بے شمار ریکارڈ قائم کیے ہیں اور امریکہ میں اس وقت 17 ٹریلین ڈالر کی سرمایہ کاری آ چکی ہے ،جو بائیڈن کے دور میں صرف ایک ٹریلین ڈالر سے بھی کم سرمایہ کاری آئی۔
انہوں نے کہا کہ ہم ان افراد کے لیے صحت کی سہولیات کا خرچ نہیں اٹھا سکتے جو غیر قانونی طور پر ملک میں موجود ہیں۔
