کراچی: نامور کامیڈین اور اداکار شکیل صدیقی نے کہا ہے کہ پاکستان میں کامیڈینز کی عزت نہیں کی جاتی، مجھے اس ملک میں بے پناہ محبت ملی جس کی بدولت بیرون ملک، حتی کہ بھارت میں بھی مواقع ملے، اگر یہاں عزت نہ ملتی تو دنیا بھر میں پرفارم کرنے کے لیے مجھے ٹکٹ اور ویزہ کون دیتا؟، میں نے اپنے کیریئر میں چند ایسے کردار قبول کیے جس پر آج بھی افسوس ہے، ٹی وی پر زیادہ کام مواقع کی کمی اور معیاری کردار نہ ملنے کی وجہ سے کیا۔
ایک انٹرویو میں انہوں نے کہاکہ اگر کراچی کو ابتدا ہی سے مرکز بنایا جاتا تو شاید انڈسٹری زوال کا شکار نہ ہوتی۔ انہوں نے ناقص ڈبنگ اور غیر ذمہ دارانہ پروڈکشن کے فیصلوں کو انڈسٹری کی تباہی کی بڑی وجہ قرار دیا۔
انہوں نے پاکستان میں فیملی ولاگنگ کے بڑھتے ہوئے رجحان پر شدید تحفظات کا اظہار کرتے ہوئے کہا ہے کہ ماں اور بہنوں کو مواد کی تخلیق کے نام پر سوشل میڈیا پر لانا درست عمل نہیں۔ انہوں نے کہا کہ سوشل میڈیا ایک طاقتور پلیٹ فارم ضرور ہے مگر پاکستان میں اسے زیادہ تر پروپیگنڈے کے لیے استعمال کیا جا رہا ہے۔
انہوں نے کہا کہ فیملی ولاگنگ بہت آگے نکل چکی ہے، تفریح کے نام پر ماں اور بہنوں کو بلاوجہ دکھایا جا رہا ہے، اگر ماں کو کچن میں کھانا بناتے دکھایا جائے تو یہ قابلِ قبول ہے لیکن جو کچھ آج کل ہو رہا ہے، وہ حدود سے تجاوز ہے اور بچوں کے لیے غلط مثال قائم کر رہا ہے۔
کامیڈین نے انکشاف کیا کہ میرا 12 سالہ بیٹا بھی فیملی ولاگز دیکھتا ہے جس پر مجھے شدید فکر لاحق ہے، جب میں اپنے بیٹے کو یہ ولاگز دیکھتے ہوئے دیکھتا ہوں تو اس کا فون لے لیتا ہوں، کیونکہ یہ سب رکنا چاہیے۔
