اسلام آباد: وفاقی وزیر اطلاعات عطااللہ تارڑ نے کہا ہے کہ حکومت ناگہانی صورتحال سے نمٹنے کے لیے کوشاں ہے، مشکل وقت میں پاکستانی قوم ایک ہو جاتی ہے، نیشنل رسپانس خیبرپختونخوا میں بھی دیا گیا، پنجاب میں بھی اقدامات جاری ہیں، آبی گزرگاہوں میں تعمیرات کے نقصان کا معاوضہ ادا کرنا ممکن نہیں، غیر قانونی تعمیرات کا کوئی ازالہ نہیں ہو سکتا، حکومت آبی گزرگاہوں میں تعمیرات کی اجازت نہیں دیگی۔
وزیر آباد میں سیلاب کی صورتحال پر میڈیا بریفنگ کے دوران وفاقی وزیر اطلاعات عطااللہ تارڑ نے کہا کہ پنجاب میں سیلاب میں پھنسے لوگوں کو بحفاظت نکال کر ان کی جانیں بچائی گئیں، ٹوٹنے والی سڑکوں کے سروے کا کام آج مکمل ہو جائے گا، جہاں جہاں بجلی کے مسائل پیش آئے اسے بھی حل کیا جا رہا ہے۔
وفاقی وزیر اطلاعات نے کہا کہ پنجاب میں سیلاب سے لائیو اسٹاک کا بہت زیادہ نقصان ہوا، اس کے لیے بھی ایک سروے کروایا جائے گا، جس کے بعد مالکان کی ہر ممکن مدد کی جائے گی۔ انہوں نے کہا کہ ہمیں احساس ہے لوگ مشکل میں ہیں، ہماری ہمدردی ان کے ساتھ ہے، کوشش ہے کہ جو لوگ بے گھر ہوئے، انہیں جلد از جلد واپس ان کے علاقوں میں پہنچائیں۔
عطااللہ تارڑ نے خبردار کیا کہ ابھی بھی بارشوں کا خطرہ ٹلہ نہیں ہے، لوگوں کو اس حوالے سے آگاہ کرنے کی ضرورت ہے، جمع پانی سے بیماریاں پھیلنے کا خدشہ ہے، جس سے بچا کے لیے اقدامات اٹھا رہے ہیں۔
انہوں نے کہا کہ مشکل ترین صورتحال کے باوجود ہم نے شاندار ٹیم ورک کیا، جس کی وجہ سے کم سے کم جانی نقصان ہوا، وزیراعظم شہباز شریف، وزیراعلی پنجاب مریم نواز شریف، این ڈی ایم اے، پی ڈی ایم اے، ریسکیو 1122، ضلعی انتظامیہ اور پاک فوج نے سیلابی صورتحال میں مل کر کام کیا، ایسے مثالی رابطے کم دیکھنے کو ملتے ہیں۔
