لاہور: وزیراعلی پنجاب مریم نواز نے تھائی لینڈ کی کاروباری برادری کو سرمایہ کاری کی دعوت دیتے ہوئے کہاہے کہ پنجاب حکومت ڈیجیٹل نیشن کے وژن کے تحت نوجوانوں کو جدید شعبوں میں ہنرمند بنا رہی ہے، ثقافتی سفارتکاری، تعلیم و سیاحت کا فروغ دونوں ممالک کی عوام کو قریب لانے کاموثر ذریعہ ہیں۔
جاری بیان کے مطابق وزیراعلی مریم نواز کے اعزاز میں تھائی لینڈ کے سابق وزیراعظم و ٹیلی کمیونیکیشن شعبے کی ممتاز کاروباری شخصیت تھکسان شینا وترا کی جانب سے عشائیہ تقریب کا انعقاد کیا گیا جس میں تھائی لینڈ کی تاریخ کی کم عمر ترین سابق خاتون وزیراعظم پائیتونگترن شینا وترا نے بھی شرکت کی۔
تھکسان شینا وترا اور ان کی صاحبزادی نے وزیراعلی مریم نواز کا پرتپاک استقبال کیا اور لیگی صدر نواز شریف کیلئے نیک تمنائوں اور خیر سگالی جذبات کا اظہار کیا۔دونوں سابق وزرائے اعظم نے مریم نواز شریف کے ترقیاتی وژن، انتظامی اقدامات اور عوامی فلاح کے منصوبوں کو سراہا۔ تھکسان شینا وترا نے گفتگو کرتے ہوئے کہا کہ آپ اور آپ کے والد کی عوامی جدوجہد متاثر کن ہے۔
اس موقع پر وزیراعلی مریم نواز نے تھائی قیادت کی عوامی خدمات، اصلاحات اور معیشت کی ترقی کیلئے اقدامات کو سراہتے ہوئے کہا کہ تھائی لینڈ میں آپ کی متعارف کردہ اصلاحات نے ادارہ جاتی صلاحیت میں اضافے کی نئی مثال قائم کی ہے۔
انہوں نے ثقافتی سفارتکاری، تعلیم اور سیاحت کے فروغ کو عوام کو قریب لانے کا موثر ذریعہ قرار دیتے ہوئے کہا کہ پنجاب حکومت ڈیجیٹل نیشن کے وژن کے تحت نوجوانوں کو جدید شعبوں میں ہنرمند بنا رہی ہے۔
مریم نواز نے کہا کہ پاکستان اور تھائی لینڈ کی دوستی باہمی احترام، معاشی تعاون اور ثقافتی ہم آہنگی پر مبنی ہے، ہم ٹیکسٹائل، زراعت، سیاحت اور ٹیکنالوجی کے شعبوں میں تجارت اور سرمایہ کاری کو فروغ دینا چاہتے ہیں۔ انہوں نے کہا کہ تھائی کاروباری برادری پنجاب کی جانب سے فراہم کردہ مراعات سے فائدہ اٹھا سکتی ہے ۔
