مسقط (لارڈ میڈیا): عمان کے ساحل کے قریب تباہ شدہ آئل ٹینکر سے تیل کا اخراج جاری ہے، جو اب عمان کی سرزمین تک پہنچ چکا ہے۔ گرین پیس کے مطابق تیل کا پھیلاؤ تقریباً 1300 مربع کلومیٹر تک پہنچ چکا ہے، اور اس کے مزید بڑھنے کا خدشہ ہے۔
عمانی حکام کا کہنا ہے کہ تیل سمندر سے نکل کر مرکزی سرزمین تک پہنچ گیا ہے، لیکن متاثرہ علاقے کے مجموعی حجم کی باضابطہ تصدیق نہیں کی گئی۔
ماہرین نے خبردار کیا ہے کہ تیل کے اخراج سے سمندری آبی حیات کو شدید نقصان پہنچ سکتا ہے، خاص طور پر مسیرہ جزیرے کے قریب۔
ماحولیاتی تنظیم گرین پیس نے تیل کے پھیلاؤ کی تصاویر کا تجزیہ کرتے ہوئے کہا ہے کہ آلودگی سمندر کے مختلف حصوں میں پھیلی ہوئی ہے۔
ٹینکر میں روسی خام تیل تھا، جو یورپی یونین اور دیگر ممالک کی پابندیوں کی زد میں تھا۔
اقوام متحدہ کی بین الاقوامی میری ٹائم تنظیم کے مطابق مون سون کے موسمی حالات نے ٹینکر تک رسائی محدود کردی ہے، تاہم ہنگامی منصوبہ بندی موجود ہے۔
