بیجنگ (شِنہوا) چینی وزارت خارجہ کے ترجمان گوجیا کن نے کہا ہے کہ چین کی جانب سے نیپال کے لئے ہنگامی امدادی سامان کی تیسری کھیپ جمعرات کی صبح روانہ کر دی گئی ہے۔
انہوں نے معمول کی میڈیا بریفنگ کے دوران ایک سوال کے جواب میں بتایا کہ امدادی سامان میں خیمے، کمبل، لاشوں کو محفوظ رکھنے والے فریزر، طبی حفاظتی لباس اور سیٹلائٹ مواصلاتی آلات شامل ہیں۔
ترجمان نے بتایا کہ ڈی این اے کی شناخت کے ماہرین کی دوسری ٹیم بھی اسی پرواز کے ذریعے نیپال روانہ ہوئی ہے جو متعلقہ امور میں نیپالی ماہرین کی معاونت کرے گی۔
گو جیا کن نے کہا کہ چین نیپال کی ضروریات کے مطابق ہنگامی امداد جاری رکھے گا اور بین الاقوامی امدادی تعاون میں حصہ لے گا۔
انہوں نے کہا کہ آفت کے وقوع پذیر ہونے کے بعد سے چین کے محکمہ موسمیات اور آبی وسائل کے حکام نے اپنے نیپالی ہم منصبوں کے ساتھ قریبی تعاون برقرار رکھا ہے، نگرانی سے متعلق معلومات کا تبادلہ کیا ہے اور آفت سے نمٹنے کے لئے مشترکہ اقدامات کئے ہیں۔
انہوں نے بتایا کہ نیپالی فریق نے آفت سے نمٹنے کے لئے چین کی جانب سے نیپال کے شانہ بشانہ ہونے اور امدادی کوششوں میں اہم معاونت فراہم کرنے پر شکریہ ادا کیا ہے اور کہا ہے کہ یہ چین اور نیپال کے درمیان عظیم ہمسایہ دوستی کو اجاگر کرتا ہے۔
گو جیا کن نے مزید کہا کہ چین متعلقہ شعبوں میں نیپال کے ساتھ تعاون مزید مضبوط بنائے گا اور نیپال کی ہنگامی امدادی اور آفت سے نمٹنے کی کوششوں کے لئے بھرپور معاونت فراہم کرتا رہے گا۔
