رام اللہ (لارڈ میڈیا) اسرائیلی فضائی حملے میں جمعہ کو مغربی کنارے کے شمالی شہر جنین میں کم از کم تین فلسطینی جاں بحق ہوگئے۔ فلسطینی ذرائع نے بتایا کہ اسرائیلی جنگی طیارے نے شہر کے حرش السعدہ علاقے میں ایک گھر کو نشانہ بنایا۔
مقامی ذرائع کے مطابق حملے کے بعد اسرائیلی فورسز نے شہر میں تعیناتی کی۔ فلسطینی ریڈ کریسنٹ سوسائٹی نے اپنے بیان میں کہا کہ اس کی طبی ٹیمیں متاثرہ گھر تک اسرائیلی فورسز کے پہنچنے سے پہلے پہنچ گئیں، مگر انہیں بعد میں وہاں روک لیا گیا۔
فورسز نے طبی ٹیموں کو ان کا سامان ضبط کرنے کے بعد علاقے سے نکلنے کا حکم دیا اور انہیں زخمی افراد یا لاشوں کو نکالنے کی اجازت نہیں دی۔
اسرائیلی فوج اور شین بیٹ نے مشترکہ بیان میں کہا کہ حملہ ان کی جانب سے کیا گیا اور مرنے والوں میں سے ایک کو "حماس کا کارکن” قرار دیا۔ ان کے مطابق، "اسرائیلی فضائیہ کے حملے میں دو ساتھیوں سمیت ہلاک ہوا اور ان کی گاڑی میں ہتھیار بھی ملے۔”
حملے کے بعد حماس نے اسے "قتل عام” قرار دیتے ہوئے مغربی کنارے میں "مزاحمت کے طریقوں کو بڑھانے” کی اپیل کی۔ یہ فضائی حملہ مغربی کنارے میں بڑھتے ہوئے تشدد کے پس منظر میں ہوا ہے جہاں اسرائیلی فورسز نے چھاپے تیز کر دیے ہیں اور فلسطینیوں کو بڑھتے ہوئے آبادکار حملوں اور زمینوں کی ضبطی کا سامنا ہے۔
