واشنگٹن (لارڈ میڈیا): امریکی محکمہ دفاع نے فوجی اخبار ‘اسٹارز اینڈ اسٹرائپس’ کے ایڈیٹر ان چیف ایرک سلاون، پبلشر میکس لیڈرر اور مشرق وسطیٰ کی رپورٹر لارا کورٹے کو ان کے عہدوں سے برطرف کر دیا ہے۔ تینوں کو برطرفی کے نوٹس میں ‘نافرمانی’ کو وجہ قرار دیا گیا ہے اور انہیں فیصلے کے خلاف اپیل کے لیے پانچ دن کی مہلت دی گئی ہے۔
برطرفیاں ایسے وقت میں ہوئی ہیں جب اخبار کی انتظامیہ نے ادارتی پالیسی میں پینٹاگون کی ممکنہ مداخلت کے خلاف اپنے تحفظات کا اظہار کیا تھا۔ ایرک سلاون نے کہا کہ انہیں انٹرویو میں فوجیوں کے لیے کسی بھی قسم کی سنسرشپ ناقابل قبول قرار دینے پر نافرمانی کا مرتکب قرار دیا گیا۔
اخبار کے پبلشر میکس لیڈرر نے برطرفی سے چند روز قبل ریٹائرمنٹ کا اعلان کیا تھا۔ رپورٹس کے مطابق وہ پینٹاگون کی جانب سے اخبار میں نئے ڈپٹی پبلشر کی تعیناتی پر اختلاف رکھتے تھے۔
‘اسٹارز اینڈ اسٹرائپس’ نے حالیہ عرصے میں ایران کے خلاف جنگ کے دوران فوجیوں کی مشکلات پر رپورٹس شائع کی تھیں، جن میں کمزور مورال اور اسلحے کی قلت جیسے مسائل شامل تھے۔ ان رپورٹس نے پینٹاگون کے ساتھ کشیدگی کو مزید بڑھا دیا۔
امریکی صحافتی تنظیموں نے بھی برطرفیوں پر تشویش کا اظہار کیا ہے۔ نیشنل پریس کلب کے صدر مارک شوف جونیئر نے سلاون کی برطرفی کو فوجی کوریج پر کنٹرول کی کوشش قرار دیتے ہوئے فیصلے پر نظرثانی کا مطالبہ کیا۔
پینٹاگون کی جانب سے برطرفیوں کی تفصیلی وجوہات پر فوری طور پر کوئی ردعمل نہیں آیا، تاہم یہ اقدام میڈیا اور حکومت کے درمیان کشیدگی کے تناظر میں سامنے آیا ہے۔
