مکاؤ (شِنہوا) مکاؤ خصوصی انتظامی خطے (ایس اے آر) کی حکومت نے مکاؤ خصوصی انتظامی خطے کی اقتصادی و سماجی ترقی کے تیسرے پانچ سالہ منصوبے (2026-2030) کا اجرا کر دیا۔
مکاؤ خصوصی انتظامی خطے کے چیف ایگزیکٹو سام ہو فائی نے منصوبے کے تعارف کے لئے ایس اے آر حکومت کے صدر دفتر میں منعقدہ پریس کانفرنس میں کہا کہ تیسرا پانچ سالہ منصوبہ مکاؤ میں ’’ایک ملک، دو نظام‘‘ کے اصول کو آگے بڑھانے اور ملک کی مجموعی ترقی میں بہتر طور پر ضم ہونے اور اس میں اپنا کردار ادا کرنے کے لئے ایک اہم اقدام ہے۔
10 حصوں اور 36 ابواب پر مشتمل اس منصوبے میں ترقی کے 8 اہداف مقرر کئے گئے ہیں، جن میں قومی سلامتی کے جامع نقطہ نظر پر مکمل عملدرآمد یقینی بنانا، قانون کی بنیاد پر حکمرانی کی اثر انگیزی بہتر بنانا، اقتصادی تنوع میں خاطر خواہ پیش رفت کرنا، ہینگ چھن میں گوانگ ڈونگ-مکاؤ گہرے تعاون زون کی اعلیٰ معیار کی ترقی کو آگے بڑھانا، تعلیم، ٹیکنالوجی اور افرادی قوت کی مربوط ترقی کے نمایاں نتائج حاصل کرنا، عوامی فلاح و بہبود کو مزید بہتر بنانا، خوبصورت اور ’’سمارٹ‘‘ مکاؤ کی تعمیر میں نمایاں پیش رفت کرنا اور ملک کی مجموعی ترقی میں بہتر طور پر ضم ہو کر اس میں اپنا کردار ادا کرنا شامل ہیں۔
چین کے جنوبی مکاؤ خصوصی انتظامی خطے (ایس اے آر) کی اقتصادی و سماجی ترقی کے تیسرے پانچ سالہ منصوبے کے تعارف کے لئے منعقدہ پریس کانفرنس کا منظر۔(شِنہوا)
چیف ایگزیکٹو نے کہا کہ ایس اے آر حکومت قومی ترقی کے وسیع تر تناظر میں مکاؤ کے لئے فعال طور پر منصوبہ بندی اور حکمت عملی وضع کر رہی ہے اور ملک کے 15ویں پانچ سالہ منصوبے سے متعلقہ انتظامات پر فعال طور پر عملدرآمد کر رہی ہے۔
سام نے 2026 سے 2030 کے عرصے کے لئے 4 اہم امور کا خاکہ پیش کیا جن میں بڑے منصوبوں اور حکومتی معاونتی فنڈ کے ذریعے موزوں اقتصادی تنوع کو آگے بڑھانا، ہینگ چھن کے ساتھ مربوط ترقی کو گہرا کرنا اور تعاون کے زون کی اعلیٰ معیار کی ترقی کو آگے بڑھانا، شہری تجدید کو تیز کرنا اور خوبصورت و ’’سمارٹ‘‘ مکاؤ کی تعمیر کرنا اور مکاؤ کے چینی مین لینڈ اور دنیا کے ساتھ رابطوں کو مضبوط بناتے ہوئے ملک کی مجموعی ترقی میں بہتر طور پر ضم ہونا اور اس میں اپنا کردار ادا کرنا شامل ہیں۔
یہ منصوبہ 20 مئی سے 28 جون تک جاری رہنے والی عوامی مشاورت کے بعد جاری کیا گیا، جس کے دوران ایس اے آر حکومت نے معاشرے کے مختلف شعبوں سے آراء اور تجاویز طلب کیں۔
مکاؤ پولی ٹیکنک یونیورسٹی کے سوشل، اکنامک اینڈ پبلک پالیسی ریسرچ سنٹر کے ڈائریکٹر ین یی فین نے شِنہوا کو بتایا کہ مکاؤ کا پانچ سالہ منصوبہ بندی کا نظام ’’اقتصادی تنوع اور پالیسی میں ہم آہنگی کے لئے دو بنیادی فوائد فراہم کرتا ہے۔‘‘
ین نے مزید کہا کہ یہ نظام ’’ایک ملک، دو نظام‘‘ کے اصول کے تحت کام کرتا ہے اور اس فریم ورک کے لئے ایک اہم ادارہ جاتی تکمیل کا کردار ادا کرتا ہے۔ یہ مکاؤ کی ترقی کو قومی حکمت عملیوں سے ہم آہنگ کرتا ہے جبکہ وسیع تر تقاضوں کو معیشت، عوامی فلاح و بہبود اور سلامتی سے متعلق قابل پیمائش اہداف میں تبدیل کرتا ہے اور ایس اے آر کی حکمرانی کے لئے ادارہ جاتی صلاحیت کو مستحکم کرتا ہے۔
