اسلام آباد (لارڈ میڈیا): وزیراعظم شہباز شریف نے پاکستان فرسٹ نیشنل یوتھ ایمپلائیمنٹ پالیسی کا اجرا کیا اور دانش اسکول کے پوزیشن ہولڈرز میں ایوارڈز تقسیم کیے۔ انہوں نے کہا کہ پاکستان کی آبادی کا بڑا حصہ نوجوانوں پر مشتمل ہے اور قوم کو ان سے بہت امیدیں وابستہ ہیں۔
شہباز شریف نے اعلان کیا کہ حکومت نوجوانوں کی تعلیم، تربیت اور روزگار کو اپنی ترجیحات میں شامل کرتی ہے۔ انہوں نے دانش اسکولز کے منصوبے کو دیگر صوبوں تک وسعت دینے کا بھی اعلان کیا۔
وزیراعظم نے بتایا کہ گزشتہ سال ایک ہزار زرعی گریجوایٹس کو چین بھیجا گیا اور رواں سال آئی ٹی اور مصنوعی ذہانت کی تعلیم کے لیے بھی نوجوانوں کو بھیجا جائے گا۔ انہوں نے کہا کہ یہ عمل مکمل طور پر میرٹ کی بنیاد پر ہوگا۔
انہوں نے واضح کیا کہ حکومت نوجوانوں کو جدید ٹیکنالوجی کے شعبوں میں مہارت حاصل کرنے کے لیے عالمی معیار کی تعلیم اور تربیت کے مواقع فراہم کرے گی۔ وزیراعظم نے 7 لاکھ لیپ ٹاپس کی تقسیم کا بھی ذکر کیا۔
شہباز شریف نے اس عزم کا اظہار کیا کہ نوجوان نسل کو تعلیم، جدید ٹیکنالوجی، روزگار اور ترقی کے مساوی مواقع فراہم کرنے کے لیے اقدامات جاری رکھے جائیں گے۔
