اولان باتور (شِنہوا) چین میں مقامی طور پر تیار کردہ بڑا مسافر بردار طیارہ سی 919 بدھ کی سہ پہر بیجنگ کیپیٹل انٹرنیشنل ایئرپورٹ سے روانہ ہونے کے بعد منگولیا کے نئے اولان باتور ہوائی اڈے پر بحفاظت اتر گیا جس کے ساتھ ہی طیارے کی پہلی باقاعدہ بین الاقوامی تجارتی مسافر پرواز مکمل ہوگئی۔
ہوائی اڈے پر طیارے کا شاندار واٹر سیلیوٹ کے ذریعے استقبال کیا گیا۔ مسافر بتدریج طیارے سے اترے، انہوں نےمنفرد روایتی نسلی رقص کی پرفارمنس دیکھی اور روایتی منگولیائی لباس میں ملبوس استقبال کرنے والے عملے کی قطار نے ان کا خیرمقدم کیا۔
سی 919 کے تجارتی آپریشن میں شامل ہونے کے بعد یہ اس کا پہلا بین الاقوامی روٹ ہے، جو چین میں مقامی طور پر تیار کردہ مین لائن مسافر طیارے کے باقاعدہ بین الاقوامی آپریشن کے ایک نئے مرحلے میں باضابطہ داخلے کی علامت ہے۔
دستیاب معلومات کے مطابق یہ بین الاقوامی روٹ سی اے 723اور سی اے 724 پرواز نمبروں کے تحت چلایا جائے گا، جس پر روزانہ باقاعدہ پروازیں شیڈول کی گئی ہیں۔
چین کے شہری استعمال کے لئے مقامی طور پر تیار کردہ پہلے بڑے مسافر بردار جیٹ طیارے کے طور پر سی 919 نے تجارتی سروس شروع کرنے کے بعد متعدد ملکی روٹس پر کامیابی سے خدمات انجام دی ہیں۔ قابل اعتماد پرواز کی کارکردگی، آرام دہ کیبن اور مستحکم حفاظتی معیار کے باعث اسے مارکیٹ میں وسیع پیمانے پر پذیرائی حاصل ہوئی ہے۔
چین اور منگولیا کے درمیان اس بین الاقوامی روٹ پر پرواز کا آغاز اس بات کا مظہر ہے کہ سی 919 نے دونوں ممالک کے بین الاقوامی سول ایوی ایشن آپریٹنگ معیارات کی جانچ کامیابی سے مکمل کرلی ہے، جس کے نتیجے میں اسے باقاعدہ بین الاقوامی تجارتی مسافر پروازیں چلانے کی باضابطہ اہلیت حاصل ہوگئی ہے۔
