کیلیفورنیا (لارڈ میڈیا): فیس بک، دنیا کا مقبول ترین سوشل میڈیا پلیٹ فارم، اب میٹا کی جانب سے ایسی بڑی تبدیلیوں کی زد میں ہے جو اس کے استعمال کے تجربے کو مکمل طور پر بدل دیں گی۔ کمپنی نے اعلان کیا ہے کہ فیس بک میں جلد ہی فل اسکرین ویڈیو فیڈ متعارف کرائی جائے گی جو صارفین کو ٹک ٹاک جیسا تجربہ فراہم کرے گی۔
میٹا نے بتایا ہے کہ صارفین کو اپنی فیس بک پروفائلز پر مفت ویریفکیشن بیج یا ٹک حاصل کرنے کی سہولت بھی دی جائے گی۔ کمپنی کا کہنا ہے کہ یہ تبدیلیاں وہ ہیں جو صارفین کی خواہشات کے مطابق ہیں اور ویڈیو مواد کو اولین ترجیح دی جا رہی ہے۔
کمپنی نے وضاحت کی کہ اگر صارفین کو یہ نئی تبدیلی پسند نہ آئے تو وہ واپس کلاسیک فیس بک فیڈ پر بھی جا سکتے ہیں، جو نیوی گیشن میں سیکنڈری ٹیب میں بدستور دستیاب ہوگی۔
ویڈیو فرسٹ فیڈ کو رواں سال کے دوران پہلے محدود ممالک میں پیش کیا جائے گا، جہاں ویڈیوز کو زیادہ ترجیح دی جاتی ہے۔ میٹا کا کہنا ہے کہ اس نئے تجربے کے ذریعے صارفین کو تفریح کے ساتھ ساتھ مستند کریئیٹرز سے جوڑنے کا موقع ملے گا۔
