یمن (لارڈ میڈیا): یمن کے ایران نواز حوثی باغیوں نے بحیرہ احمر میں سعودی جہازوں کو خبردار کیا ہے کہ وہ اس راستے کا استعمال نہ کریں، ورنہ نشانہ بنایا جائے گا۔ یہ انتباہ اس وقت آیا ہے جب آبنائے ہرمز کی بندش کے بعد بحیرہ احمر سعودی تیل کی برآمدات کے لیے اہم راستہ بن چکا ہے۔
حوثیوں نے ایف ایم ریڈیو پر انگریزی زبان میں پیغام نشر کیا، جس میں سعودی جہازوں کو خلیج عدن کے راستے سفر کرنے کی ہدایت کی گئی۔ حوثیوں نے کہا کہ ہدایات پر عمل نہ کرنے والے جہاز حملوں کا شکار ہو سکتے ہیں۔
پیر کے روز حوثی قیادت نے سعودی جہازوں کے خلاف بحری ناکا بندی کا اعلان کیا تھا، جس کی سعودی عرب نے سخت مذمت کی ہے۔ یونان کی میری ٹائم سیکیورٹی ایجنسی نے اس اعلان کو خطے میں سمندری سلامتی کے لیے خطرناک قرار دیا ہے۔
حوثیوں نے شپنگ کمپنیوں کو ای میل کے ذریعے خبردار کیا کہ سعودی بندرگاہوں پر کارگو کی لوڈنگ ممنوع ہے، خلاف ورزی کرنے والے جہاز پابندیوں کا شکار ہو سکتے ہیں۔
بحیرہ احمر اس وقت سعودی عرب کے لیے تیل کی برآمدات کا اہم متبادل راستہ ہے، جبکہ باب المندب کی گزرگاہ سے عالمی سمندری تجارت کا 15 فی صد حصہ گزرتا ہے۔ ماہرین کے مطابق اس علاقے میں کشیدگی کے سبب عالمی شپنگ صنعت کو سالانہ تقریباً 20 ارب ڈالر کا نقصان ہو سکتا ہے۔
