واشنگٹن (لارڈ میڈیا): امریکی صدر ڈونلڈ ٹرمپ نے اعلان کیا ہے کہ ایران پر شدید حملہ کیا گیا ہے، جسے امریکی فوجیوں کی ہلاکت کے ردعمل میں انجام دیا گیا۔ انہوں نے کہا کہ ایران پر یہ حملے امریکی فوجیوں کے اعزاز میں کیے گئے ہیں جو ایران کو ایٹمی ہتھیار حاصل کرنے سے روکنے کے لیے لڑتے ہوئے ہلاک ہوئے۔
صدر ٹرمپ نے صحافیوں سے گفتگو کرتے ہوئے کہا کہ ایران کو عسکری لحاظ سے بھاری نقصان اٹھانا پڑا ہے۔ انہوں نے دعویٰ کیا کہ آبنائے ہرمز پر اب امریکہ کا مکمل کنٹرول ہے جبکہ ایران کے پاس کچھ میزائل، ڈرون اور پیداواری صلاحیت باقی ہے، لیکن وہ کافی نہیں ہیں۔
امریکی سینٹرل کمانڈ (سینٹکام) کے مطابق، ایران پر مسلسل نویں رات حملے کیے گئے، جن میں ڈرون اور میزائل لانچ سائٹس کو نشانہ بنایا گیا۔ سینٹکام نے بتایا کہ یہ حملے ایرانی فوجی صلاحیتوں کو مزید کمزور کرنے کے لیے کیے جا رہے ہیں، تاکہ وہ تجارتی جہازوں اور شہری ملاحوں پر حملے نہ کر سکیں۔
صدر ٹرمپ نے فیفا ورلڈ کپ کے حوالے سے بھی بات کی اور فیفا صدر اور ان کی ٹیم کو شاندار کام پر مبارکباد دی۔ انہوں نے کہا کہ دنیا بھر سے لوگ امریکہ آئے اور یہاں کے ماحول کو پسند کیا۔
