واشنگٹن (لارڈ میڈیا): ایک امریکی عہدیدار نے کہا ہے کہ ایران نے امریکی فضائی دفاعی نظام کے خلاف اپنی فوجی حکمت عملی میں اہم تبدیلیاں کی ہیں، جس سے اس کے میزائل زیادہ مؤثر ثابت ہو رہے ہیں۔ عہدیدار نے وال اسٹریٹ جرنل کو بتایا کہ ایران اب تیز رفتار میزائل استعمال کر رہا ہے جو دوران پرواز راستہ تبدیل کر سکتے ہیں، جس کی وجہ سے انہیں روکنا مشکل ہو گیا ہے۔ ان کے مطابق ان تبدیلیوں سے ایران کی حساس فوجی اہداف کو نشانہ بنانے کی صلاحیت میں اضافہ ہوا ہے۔
امریکی عہدیدار نے کہا کہ ایرانی میزائلوں کی رفتار اور جدید ٹیکنالوجی امریکی دفاعی نظام کے لیے نئے چیلنجز پیدا کر رہی ہے۔ انہوں نے مزید تکنیکی تفصیلات نہیں دیں، مگر کہا کہ امریکا اور اتحادی اس صورتحال کا جائزہ لے رہے ہیں۔
یہ بیان ایسے وقت آیا جب مشرق وسطیٰ میں امریکا اور ایران کے درمیان کشیدگی برقرار ہے اور دونوں ممالک کے درمیان تناؤ میں اضافہ ہو رہا ہے۔ ایران کی جانب سے ان دعوؤں پر فوری طور پر کوئی ردعمل سامنے نہیں آیا۔
دفاعی ماہرین کے مطابق اگر ایران واقعی جدید میزائل استعمال کر رہا ہے تو اس سے خطے میں عسکری توازن اور سلامتی کی صورتحال پر اثرات مرتب ہو سکتے ہیں۔
