چھنگ ڈاؤ (شِنہوا) چین اور روس کے درمیان "جوائنٹ سی-2026” مشترکہ بحری مشقیں چین کے مشرقی صوبے شان ڈونگ کے شہر چھنگ ڈاؤ میں واقع ایک فوجی بندرگاہ پر تمام طے شدہ مشقوں کی تکمیل کے ساتھ اختتام پذیر ہو گئیں۔
مشقوں کے اختتام کے بعد دونوں ممالک کی شریک بعض بحری فورسز نے مشترکہ گشت کے لئے بحرالکاہل کی جانب روانگی اختیار کی۔
دونوں ممالک کی بحری افواج نے "سمندری سلامتی کو درپیش خطرات کا مشترکہ مقابلہ” کے موضوع پر ہونے والی ان مشقوں میں سطح آب، زیر آب، فضائی اور معاون یونٹس سمیت 10 بحری جہاز تعینات کئے۔
بندرگاہ میں منصوبہ بندی کے مرحلے کے دوران دونوں فریقوں نے ٹیبل ٹاپ مشقوں، بحری جہازوں کے دوروں، پیشہ ورانہ سیمینارز، استقبالیہ تقریبات اور باسکٹ بال مقابلوں سمیت مختلف سرگرمیوں میں حصہ لیا۔
سمندر میں دونوں بحری افواج نے براہ راست جنگی اور فائرنگ کی مشقیں کیں، جن میں مشترکہ جاسوسی، فضائی اور میزائل دفاع، سطح آب پر موجود اہداف پر حملے اور آبدوزوں کے مشترکہ امدادی آپریشن شامل تھے۔
مشقوں کے چینی چیف ڈائریکٹر کے مطابق ان مشترکہ مشقوں میں حقیقی سمندری اور فضائی جنگی ماحول کی بھرپور عکاسی کی گئی، جس میں جنگی تیاری پر خصوصی توجہ مرکوز رہی۔
انہوں نے مزید کہا کہ ان مشترکہ مشقوں سے دونوں افواج کے درمیان اسٹریٹجک باہمی اعتماد مزید مضبوط ہوا، دیرینہ دوستی کو تقویت ملی اور سمندری بحرانوں سے مشترکہ طور پر نمٹنے کی صلاحیت میں اضافہ ہوا۔
"جوائنٹ سی-2026” مشقوں کا آغاز 6 جولائی کو ہوا تھا اور یہ 2012 سے جاری اس سلسلے کی بارہویں مشترکہ بحری مشقیں تھیں۔
بحری تحقیقی اکیڈمی کے محقق ژینگ ہونگ نے کہا کہ یہ مشترکہ مشقیں خطے میں امن اور استحکام کے تحفظ کے لئے نہایت اہم عملی اہمیت رکھتی ہیں۔
