واشنگٹن (لارڈ میڈیا): امریکی صدر ڈونلڈ ٹرمپ نے امریکا کی 250ویں سالگرہ کے موقع پر اعزازی امریکی پاسپورٹ کا نیا ڈیزائن پیش کیا ہے، جس میں ان کی تصویر نمایاں طور پر شامل کی گئی ہے۔ یہ تصویر وائٹ ہاؤس کے مشہور ریزولوٹ ڈیسک پر صدر ٹرمپ کو دکھاتی ہے، جبکہ پس منظر میں امریکا کے تاریخی اعلانِ آزادی کا متن موجود ہے۔
صدر ٹرمپ نے اپنے سوشل میڈیا پلیٹ فارم ٹروتھ سوشل پر پاسپورٹ کے ڈیزائن کی تصویر شیئر کرتے ہوئے لکھا، "امریکا کا نیا پاسپورٹ، خوش آمدید، لیکن اچھا رویہ اختیار کریں!” اس ڈیزائن کو امریکی محکمہ خارجہ کی جانب سے جاری کیے گئے ابتدائی ڈیزائن سے مختلف بتایا گیا ہے، جس میں صدر کی دوسری تصویر استعمال کی گئی تھی۔
پاسپورٹ کے سامنے والے صفحے پر معروف مصور جان ٹرمبل کی تاریخی پینٹنگ "دی ڈیکلریشن آف انڈیپنڈنس” کو جگہ دی گئی ہے، جو امریکا کی آزادی کے تاریخی لمحے کی عکاسی کرتی ہے۔ اس ڈیزائن میں صدر ٹرمپ کے دستخط بھی شامل کیے گئے ہیں۔
